Imajen/Media PR.

DILI, 01 outubru 2020 (TATOLI)—Prezidente Repúblika (PR), Francisco Guterres ‘Lú Olo’, husu ba organizasaun Confederação Unidade das Organizações Frente Caixa Clandestina em Timor-Leste (CUOFCCTL) atu halo koordenasaun serbisu ho Conselho dos Combatentes da Libertação Nacional (CCLN) nu’udar organizasaun mahon ba veteranu sira.

Prezidente Repúblika husu ba konfederasaun atu rejista tuir lei haruka hodi nune’e organizasaun ne’e bele iha ninia kapasidade no personalidade jurídiku.

Organizasaun Confederação Unidade das Organizações Frente Caixa Clandestina em Timor-Leste mosu husu inisiativa organizasaun klandestina hamutuk 11 hanesan Sagrada Família, HAOK, Santo António, FITUN, ORJUMATIL, Orgão 8, Haburas, SAFARI, Nove-Nove, Zero Um no K.K Ailaletek atu hametin unidade nasionál no haforsa patriotizmu. Iha tempu badak, hafoin besik tinan ida halo konsolidasaun ba ninian estabelesimentu, organizasaun ne’e sei priense rekezitu legál nu’udar entidade formál ida.

Prezidente interinu CUOFCCTL, Tadeus Sebastião Sarmento ‘Deus’, informa organizasaun ne’e presiza nafatin hetan orientasaun hosi Xefe Estadu ba lalaok organizasaun ninian.

Prezidente Repúblika informa, organizasaun rezisténsia sira presiza distingi kargu sira-ne’ebé asume durante iha tempu luta ba libertasaun nasionál no iha tempu Timor-Leste nu’udar Estadu direitu no demokrátiku. Prinsípiu no valór rezisténsia ninian mak tenke sai nafatin matadalan ba ema hotu-hotu atu harii no hametin Estadu no Nasaun Timor-Leste.

Prezidente Repúblika hateten, laiha dúvida ba partisipasaun organizasaun klandestina ninian iha luta libertasaun nasionál. Papél organizasaun klandestina nian iha luta libertasaun nasionál importante tebe-tebes.

Confederação Unidade das Organizações Frente Caixa Clandestina em Timor-Leste nu’udar organizasaun independente ne’ebé la afilia ba partidu polítiku no organizasaun arte marsiál no rituál hodi kontribui ba prosesu dezenvolvimentu nasionál.

Komunikadu Imprensa

 

 

HAKEREK NO HATÁN

Please enter your comment!
Please enter your name here