Diretora Programa Nasionál Dezenvolvimentu Suku (PNDS), Claudina Soares Pires. Imajen TATOLI/Osória Marques.

DILI, 02 outubru 2020 (TATOLI)–Diretora Programa Nasionál Dezenvolvimentu Suku (PNDS), Claudina Soares Pires, hateten Governu liuhosi PNDS propoin sei implementa suku ida sei halo uma neen (6) ho osan milliaun $50 maibé aprovasaun hosi Konsellu Ministru hetan de’it milliaun $25 sei halo uma tolu (3) iha kada suku ida.

Notísia Relevante: PNDS husu adisionál millaun $50 harii uma ba kbiit laek

Tuir planu, nia dehan, Governu sei konstui uluk uma ba kbiit laek sira hamutuk 1000-resin iha territóriu Timor-Leste hafoin mak halo tan seluk.

“Hosi milliaun $25 ne’e ita sei halo uma tolu (3) ba iha suku ida ho nia medida iha oin rua (2) mak medida ida iha kuadradu metru 48 kompleta ho kuartu tolu (3) no haris-fatin inklui kuziña maibé iha liur depois medida ida seluk mak metru 37 ho kuartu rua (2) inklui haris-fatin ho kuziña. Tuir planu, PNDS sei halo uluk uma 1000-resin iha territóriu Timor-Leste hafoin mak halo tan seluk,” dehan Diretora PNDS, Claudina Soares Pires, ba Agência TATOLI iha nia knaar fatin, Colmera, Dili, sesta ne’e.

Kona-ba tipu uma ba kbiit laek sira, nia hatutan, konforme simu orientasaun hosi Primeiru-Minsitru no bazea ba esperiénsia ne’ebé mak iha katak halo uma ho kuartu rua (2) maibé realidade ne’ebé iha família ida dala ruma iha oan feto-mane ne’ebé barak entaun ho esperiénsia ida-ne’e deside uza tipu rua (2).

“Ita uza tipu rua (2), ida mak haree ba inan faluk ho nia-oan mak ita sei planu konstrui uma ho medida metru 37 no seluk mak dala ruma nia kbiit laek  duni maibé nia iha oan feto-mane entaun ita konstrui uma ho medida metru 48 ne’e,” esplika.

Atu konstrui um aba kbiik laek sira ne’e, nia hateten, PNDS sei trasa planu ida no halo konsultasuan másimu ho Ministériu Solidaridade Sosiál no Inkluzaun, Ministériu Asuntu Kombatente Libertasaun Nasionál (MAKLN) inklui ho Sekretáriu Estadu Protesaun Sivíl.

“Parese, semana oin, ita sei hala’o ona ita-nia planu atu oinsá identifika ema kbiit laek sira iha suku laran no haree lista sira atu prioritiza. PNDS sei la mesak atu determina katak ida-ne’e mak elizivél, lae. Maibé, fila-fali ba komunidade bazea ba lista sira-ne’ebé mak iha suku,” nia hatete.

Aleinde ida-ne’e, nia haktur, bazea ba time line PNDS nian katak konstrui uma ba kbiit laek sira sei halo iha fulan neen nia-laran de’it.

“Kona-ba konstrusaun uma konforme ba ita-nia time line ne’ebé mak iha bazeia ba esperiénsia ne’ebé iha katak bainhira halo konstrusaun ba projetu hirak ne’e, ita termina iha fulan neen (6) ka fulan hitu (7) nia laran. Ita hein katak ho partisipasaun komunidade sira-nian no involvimentu voluntáriu traballadór sira-nian, ita bele konklui sedu antes tempu ne’ebé mak ita termina,” nia esplika.

Aleinde ne’e, nia informa uma ba kbiit laek sira ne’ebé mak PNDS planea atu halo ne’e diferensa ho uma Millenium Development Goal’s (MDG’s) ne’ebé Governu anterior sira halo. 

”Uma ba kbiit laek diferensa uitoan ho uma MDG’s tanba uma ba kbiit laek ne’e planu atu halo iha komunidade ne’e nia uma fatin ne’ebé tuir ita-nia identifikasaun katak nia elizivél. Maibé kona-ba uma MDG’s ne’e uluk halo iha bairru foun ida depois mak ema kbiit laek ne’e hela ba ka ita haruka sira tun hosi foho mak hela,” Diretora PNDS informa.

Nia dehan, uma ba kbiit laek ne’e sei la halo iha bairru foun ruma tanba PNDS kontinua servisu hamutuk ho parte relevante sira atu oinsá bele identifika ema kbiit laek sira hodi bele konstrui uma refere tanba Governu sei la halo uma ba kbiit laek sira iha bairru foun maibé halo iha ema kbiit laek nia uma fatin ne’ebé mak eziste nanis ona.

Tuir planu nia hatutan, uma ba kbiit laek sira ne’ebé mak PNDS dezeña atu halo ne’e sei halo iha munisípiu 12 inklui ho Rejiaun Administrativa Espesiál Oé-Cusse Ambeno (RAEOA) ne’e sei halo fazeadamente.

Nia haktuir, bainhira halo uma ba kbiit laek sira iha suku sira hotu iha territóriu Timor-Leste, iha mós nia kritériu sira ne’ebé mak konklui hamutuk hafoin konstrui uma refere.

“Ita haree ba kritéria haat (4) ne’ebé mak ita konsidera hanesan kondisaun uma, bazeia ba rendeimentu benefisiáriu nian (loron ida sira bele hetan de’it $1,25 ka halo barter ka truka sasan), kondisaun ekonómia no kondisaun rai (jeografia). Kritériu balun ne’ebé mak hateten bainhira konstrui uma ida, labele besik mota ka mota ninin no labele iha foho lolon. Tanba ne’e, sei halo levantamentu iha terrenu maibé tenke konstrui fali iha uma ne’e nia fatin no sei la kria fali bairru foun,” nia dehan.

Jornalista: Osória Marques

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here