Primeiru-Ministru, Taur Matan Ruak hamutuk ho Membru Governu Sira, Debate iha Jeneralidade ba Orsamentu Jeral Estado 2020, iha Sala Plenáriu PN, sesta (02/10). Imajen Tatoli/Egas Cristovão

DILI, 02 outubru 2020 (TATOLI)—Parlamentu Nasionál (PN) husu VIII Governu Konstitusionál atu implementa daudaun ona pakote rekuperasaun ekonómika nune’e rekupera situasaun ekonomia rai-laran.

Deputadu Bankada Partidu Demokrátiku, Adriano do Nascimento, husu Governu avansa ho medida polítika pakote rekuperasaun ekonómika.

“Governu toma tiha inisitiva hamosu pakote rekuperasaun ekonómika no sujere atu implementa daudaun ona pakote rekuperasaun ekonómika ne’e.  Buat ruma seidauk loos, ita aprende depois hadi’a ne’e kestaun Estadu la’ós kestaun Governu ka parlamentu nian,” dehan Adriano do Nascimento liuhosi plenária Parlamentu Nasionál, kinta ne’e.

Entretantu debate jeneralidade loron daruak debate proposta Orsamentu Jerál Estdu (OJE) 2020, Prezidente Komisaun C (Finansa Públika), Deputada Maria Angélica Rangel, reforsa Governu nia polítika iha livru 1 (panorama orsamentál) maka rekuperasaun ekonómika.

“Medida polítika ba rekuperasaun ekonómika sei tau millaun $113 ba rekuperasaun ekonómika hodi rekupera fali ita-nia situasaun ekonomia iha rai-laran,” Deputada Bankada FRETILIN ne’e hateten.

Prezidente Komisaun C fundmenta, millaun $113 ba pakote rekuperasaun ekonómika ne’e hosi totál despeza biliaun $$1.497,1 iha tinan fiskál 2020 nian.

Maibé relatóriu no paresér Komisaun C nian iha loron kinta ne’e rekomenda atu pakote rekuperasaun ekonómika ne’e tenke aloka ba fundu COVID-19 la’ós aloka ba Ministériu Koordenadór ba Asuntu Ekonómika (MEKAE). Verba ne’e sei transfere ba Fundu COVID-19 liuhosi rúbrika transferénsia publika no resta liuhosi bens (sasán) no servisu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here