Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 02 outubru 2020 (TATOLI)-Ministru Petróleu no Minerál, Víctor da Conceição Soares, hateten kompañia australiana, Timor Resources sei halo perfurasaun mina-matan rai maran iha kosta súl hafoin debate Orsamentu Jerál Estadu (OJE) 2020.

“Sira adia halo perfurasaun, tuir loloos iha segunda (01/10) ne’e sira konvida ha’u atu asiste maibé ha’u maka dehan labele no hein tanba loron 05 to’o 08 sei iha diskusaun orsamentu iha faze espesialidade. Ha’u hanoin liu tiha maka ami ba haree fatin atu sira hahú halo perfurasaun,” dehan Ministru Víctor iha resintu Parlamentu Nasionál  (PN), sesta ne’e.

Ekipa tékniku kompañia Timor Resources hosi Indonézia, Austrália no Estadu Unidu Amérika (EUA) daudaun balun to’o ona atu hahú halo instalasaun ekipamentu no halo perfurasaun.

“Sira-nia tékniku balun mai ona no balun maka seidauk maibé iha kondisaun ona tanba ekipamentu sira to’o ona iha fatin no sira iha kondisaun atu hahú halo perfurasaun,” membru ezekutivu ne’e akresenta.

Notísia Relevante: Timor Resources hatama pedidu ba Governu autoriza tékniku mai Timor-Leste

Timor Resources sei  halo perfurasaun mina rai  iha parte Suai no Same.

“Iha furu tolu maka sira planu atu halo iha rai maran, rua iha Suai no ida iha Same, agora hafoin diskusaun orsamentu maka ha’u sei ba haree,” governante ne’e informa.

Tuir planu, kompañia australiana ne’e hakarak foku uluk ba posu dahuluk hanaran Karau ne’ebé lokaliza iha suku Matai, postu administrativu Maucatar, munisípiu Covalima, ho durasaun instalasaun no perfuransaun kuaze loron 40, hafoin atividade ne’e realiza maka muda fali ba posu daruak lokaliza iha aldeia Sanfuc, suku Camenaça, postu pdministrativu Suai Villa, munisípiu Covalima.

Sei halo perfurasaun dahuluk iha fatin tolu to’o lima hosi bloku ne’ebé maka iha lisensa ona hodi halo’o atividade esplorasaun ho produsaun petróleu iha Timor-Leste.

Tékniku sira identifika ona fatin tolu iha bloku A hanesan fatin ne’ebé potensiál ba perfurasaun.

Bloku A lokaliza iha munisípiu Covalima no Bloku C iha munisípiu Manufahi ho Ainaro ne’ebé hola parte ona iha rejime kontratu partilla produsaun Timor Resources, ne’ebé hanesan empreza australiana ne’ebé hola parte husi Nepean Group.

Enkuantu bloku B haruka ona ba Timor GAP Onshore Block, ne’ebé hanesan subsidiáriu ida hosi Timor GAP.

Jornalista: Natalino Costa

Editora : Julia Chatarina

HAKEREK NO HATÁN

Please enter your comment!
Please enter your name here