Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 02 setembru 2020 (TATOLI)—Deklarasaun polítika hosi bankada Partidu Demokrátika iha aprovasaun proposta Orsamentu Jerál Estadu (OJE) 2020 haktuir, faze espesialidade nu’udar instrumentu polítiku atu hatuur hikas normalidade hodi hola desizaun ba interese nasionál.

Xefe bankada PD, Deputadu António da Conceição, hateten debate OJE 2020 nafatin ho VIII Governu maibé ho nia kompozisaun polítika foun ne’ebé  viabilizasaun hosi Partidu FRETILIN nu’udar sósiu foun iha ukun VIII Governu nian.

“Biar Governu ne’e viabilizadu, OJE 2020 instrumentu politiku ida-ne’ebé importante tebes atu hatuur hikas normalidade no atu halibur ita hotu hodi hola desizaun ba interese nasionál. Ita-nia povu maioria sei moris hela iha susar laran, asesu ba fasilidade públika hanesan edukasaun, saúde, bee-moos, sanitasaun sei menus. Menus la’ós tanba laiha maibé menus tanba fasilidade ne’ebé iha barak mak kondisaun aat ona tanba halo iha tempu ne’ebé kleur ona,” Xefe Bankada PD, Deputadu António da Conceição “Kalohan”, hato’o felisitasaun ne’e iha plenária, Parlamentu Nasionál, sesta ne’e.

Nia dehan, ekonomia Timor-Leste mós ladún di’ak no ekonomia ne’ebé importada tanba investimentu iha setór produtivu hanesan agrikultura, turizmu, peska hetan atensaun kiik. Karik ida-ne’e insusesu ida hosi ukun sira ne’ebé PD mós partisipa hodi viabiliza politika hakotu krize polítika ne’ebé afeta ba nasaun hahú kedas iha tinan 2002 mai to’o 2007, PD hola responsabilidade ba ida-ne’e.

Maibé, tuir nia, PD mós husu onestidade partidu seluk no líder sira-ne’ebé mós oras ne’e ukun atu rekoñese katak situasaun ne’ebé hasoru hahú hosi 2002 sa’e mai la hanesan ona ho ambiente ne’ebé oras ne’e iha.

“Loos duni ita iha situasaun afetada tanba pandemia COVID-19 ne’ebé influénsia tebes ita-nia prosesu dezenvolvimentu maibé ita tenke onestu katak krize ida-ne’e hahú kedas ona iha tinan 2017 bainhira partidu balun hamriik ho pozisaun ne’ebé la fiar ona hodi habadak tiha VII Governu nia ukun. Ne’e mak realidade ne’ebé ita iha hodi hamosu impase naruk to’o agora,” nia dehan.

Bankada PD, nia dehan, la’ós mestre no sei la sai mestre hodi hanorin polítika ba partidu seluk ka ba deputadu ruma. Bankada PD mós hatene katak partidu sira-ne’ebé ho kadeira barak iha lian maka’as no bele halo duni barullu boot hodi defende povu nia interese.

Biar Bankada PD kiik ho kadeira lima (5) karik lian lato’o hodi halo barullu ka estrondu maibé PD nia lian bele halo hodi fó ba lian seluk iha lian bot sira-nian.

“OJE 2020 labele ona atu fó garantia hadi’a povu nia moris ho hadi’a estrada, bee-moos, eletrisidade, edukasaun, no saúde. Maibé, sei bele atu tulun agrikultór sira halo sira-nia natar, hadi’a sira-nia kafé, kuda ai-horis foun ne’ebé bele sai nu’udar variedade foun atu iha futuru mai aumenta ita-nia atividade iha komérsiu internasionál (exporatasaun produtu) no mós atu harii indústria. Seluk, para além da indústria petrokímika ne’ebé mós importante tebes nu’udar indústria dinamizadór ba dezenvolvimentu iha Timor-Leste,” Kalohan dehan.

Nia dehan, Timor-Leste ida-ne’ebé nia ukun mai hosi unidade nasionál timoroan nian labele rahun eh labele naksalak tan de’it ba inkapasidade atu lahatene simu malu nian, tan de’it interesse eletizmu hodi haluha kompromisu “defender o povo maubere”.

“Orsamentu ida-ne’e tenke sai mós instrumentu atu halo normalizasaun ba polítika nasionál. Repoin normalidade no la basta hatuur malu ba ukun. Ukun atu halo normalizasaun polítika hodi viabiliza dezenvolvimentu nasionál,” Xefe Bankada PD, António da Conceição, hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here