Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál, kinta (01/10). Imajen Tatoli/Egas Cristovão

DILI, 01 outubru 2020 (TATOLI)—Xefe Bankada Uniaun Demokrátika Timorense (UDT), Deputadu Francisco David Xavier Carlos, hateten membru Governu ne’ebé hola-parte iha estrutura Governu tenke kualidade hodi garante governasaun di’ak.

“Ita hakarak garante kualidade governasaun ida di’ak la’ós de’it atu evita korrupsaun maibé nomeasaun polítika ne’ebé sai membru Governu tenke ser kualidade. La’ós SMA oan ida sai level III sai ba sekretáriu estadu, ne’e la’ós maibé ema ne’ebé kualidade no ninia imajen iha mundu tomak,” dehan Francisco David Xavier Carlos liuhosi debate Orsamentu Jerál Estadu (OJE) 2020 iha faze jeneralidade loron dahuluk, iha plenária Parlamentu Nasionál, kinta ne’e.

Antes ne’e mós, Prezidente Komisaun A, Deputadu Joaquim dos Santos, preokupa ho membru Governu ne’ebé jere osan estadu nian iha VIII Governu Konstitusionál.

“Haree ema sira-ne’ebé iha duni kapasidade mak aloka ba kna’ar sira (finansa públika), labele naran tau ema ne’ebé laiha kapasidade ba gasta osan laloos. Ida-ne’e apenas rekomendasaun hosi komisaun deteta depois husu ba Governu atu hadi’a intermu organizasaun liuliu sistema governasaun,” dehan Joaquim dos Santos iha loron tersa ne’e.

Nia akresenta, ema sira-ne’ebé hola parte estrutura ne’e tenke hala’o servisu loloos, servisu tuir lei  no labele inventa sasán nune’e ezekusaun Orsamentu Jeral Estadu la’o tuir lei haruka no osan ne’e bele to’o iha povu nu’udar benefisiáriu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here