Diretór Jerál Turizmu MTKI, José Filipe Quintas (klaran), hamutuk ho reprezentante igreja no autoridade lokál munisípiu Ainaro, halo konferénsia imprensa relasion ho seremónia peregrinasaun nasionál iha Na’in-Feto Ramelau, iha Sentru Informasaun Turíztiku, Bidau Lecidere, sesta (02/10). Imajen Tatoli/Antónia Gusmão

DILI, 02 outubru 2020 (TATOLI)—Governu liuhosi Ministériu Turizmu, Komérsiu no Indústria (MTKI) hamutuk ho Dioseze Dili, no autoridade lokál hosi munisípiu Ainaro apela ba vizitante Na’in Feto Ramelau ne’ebé halo peregrinasaun atu obdese ba regra.

“Atu hato’o ba públiku katak iha loron 06 to’o 07 outubru ita sei halo peregrinasaun nasionál ba Na’in-Feto Ramelau, tanba ne’e husu ita hotu ninia kolaborasaun atu obedese nafatin ba regra no norma ne’ebé implementa ona,” Diretór Jerál Turizmu, José Filipe Quintas, apela liuhosi konferénsia imprensa ne’ebé realiza iha Sentru Informasaun Turístiku, iha Bidau Lecidere, sesta ne’e.

Tuir Dirijente ne’e, regra ne’ebé implementa iha sítiu relijiozu ne’e maka tenke dook hosi komportamentu ladi’ak hanesan soe lixu, silu ai, sunu rai, no ta’a ai arbiru tanba Ramelau nu’udár fatin sagradu.

“Ita komesa tenta atu minimiza, tanba ne’e maka husu atu ita hotu bainhira ba tuir peregrinasaun iha Ramelau tenke kumpre nafatin regra,” nia fó hanoin. 

Iha fatin hanesan, Reprezentante Asuntu Turizmu Relijiozu Arquidioceze Dili, Amo Ángelo Salsinha, husu sarani sira ne’ebé ba vizita Na’in-Feto Ramelau tenke hatudu atitude fiar no halo orasaun ho intensaun di’ak.

“Halo orasaun ba ita-nia família, nasaun, no ba ita ida-idak ninia grasa ne’ebé maka ita presiza. Tanba ne’e, ita hotu presiza nafatin  la’o ho ambiente fiar atubele manan grasa tanba peregrinasaun hanesan induluzénsia,” nia dehan.

Biban ne’e, Amu Angelo husu vizitante sira labele uza atributu arte-marsiál tanba iha ambiente sagradu tenke kontinua kontribui ba regulamentu ne’ebé antes ne’e iha ona.

Prezidente Komisaun Organizadora, Muises Mota, informa atividade ne’ebé sei hala’o maka hanesan misa iha Kapela Santuáriu, enkontru ho Autoridade lokál, tara-bandu no vizita fatin Santuáriu Ramelau nian.

Nia esplika, objetivu atu atu estabelese tara-bandu tanba haree ba pasadu iha joven barak bainhira halo vizita Na’in Feto Ramelau estraga ambiente no konsidera fatin ne’e hanesan baibain, tanba ne’e agora hosi parte igreja hakarak implementa regra.

“Ami hasai ona sasan lulik sira hosi uma lisan HatuBuilico no prepara ona iha loron 03 loraik simu Arcebispo ba Arquidiocese Metropolitana Dili, Dom Vigílio Do do Carmo da Silva, no bainhira to’o leten ita sei tau sasán lulik sira ne’e hodi hasa’e ba Na’in-Feto maka halo tara-bandu atu nune’e fatin ne’e sai sagradu,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here