Sekretáriu Jerál Komité 12 Novembru, Sergio Filomeno Bento Marques,. Imajen TATOLI/Osoria Marques.

DILI, 02 outubru 2020 (TATOLI)–Sekretáriu Jerál Komité 12 Novembru, Sergio Filomeno Bento Marques, hateten ko’alia kona-ba luta-na’in violénsia hodi atinje objetivu polítiku nian liga ho situasaun agora maske lidér sira ladún unidade tanba polítiku dinámika maibé tenke tau aas interese povu nian.

Notisia Relevante: Joven sira hakarak sente ukun-aan ho loos tenke redús violénsia

Nia hatutan, polítiku dinámiku maka hanesan atu harii nasaun ida iha lidér ne’ebé mak hanoin diferente maibé nia objetivu ida de’it hakarak povu nia moris di’ak.

“Ita haree kona-ba polítiku dinámizimu ne’e mak atu harii rai ida sempre iha diferente hanoin mak foin harii rai ida. Maibé objetiu ne’e ida de’it hakarak povu ne’e moris di’ak, tanba ne’e lidér sira tenke tau aas interese povu nian tanba povu fó fiar ba lidér na’in sira atu ukun,” dehan Sergio Filomeno Bento Marques, ba jornalista sira iha Uma Mahon Xanana Gusmão Reading Room, sesta ne’e.

Tanba ne’e, nia dehan, bainhira  lidér sira diskute interese komum ba povu ninian moris hatudu katak sei fó valorizasaun ba timoroan sira ne’ebé maka iha ninia espíritu nasionalizmu no patriotizmu  ne’ebé mak aas.

“Maibé bainhira diskute ba halo povu ne’e sofre ne’e hatudu katak timoroan ne’ebé maka espíritu nasionalizmu, patriotizmu mihis tebes ba rai ida-ne’e,” nia dehan.

Nia hatutan, durante ne’e tanba de’it impaktu hosi polítiku sira povu maka sai vítima entaun ita hateten katak timoroan nia nasionalizmu no ita-nia Nai ulun sira-nia nasionalizmu ne’e iha ne’ebé, tanba povu ne’e dala ruma tinan-lima maka ba vota dala ida maibé povu ne’e iha tinan-lima nia laran ne’e hakarak moris di’ak.

Nia dehan, moris di’ak ne’e la’os ba husu Governu atu fó osan maibé ezemplu projetu ruma iha munisípiu hanesan, hadia estrada ruma hosi ne’e povu sai traballdór hetan dolar ida ka rua hodi sustenta família nia moris.

“Maibé agora impase polítika buat hotu lala’o povu sofre tebes atu hetan osan hodi sustenta moris uma-laran nian. Tanba ne’e, ha’u hanoin Governu tenke haree ida-ne’e no haree interese ba povu ninia moris,” nia hateten.

Entretantu, nia dehan, bainhira lidér sira atu hamutuk hodi dezenvolve rai ida-ne’e ema ne’ebé atu fó hadame sira maka ema ne’ebé maka hetan titúlu dame nian iha mundu nia matan.

“Ha’u hanoin  polítika na’in sira hamutuk atu dezenvole rai ida-ne’e, ema sira ne’ebé maka hetan Titlu Dame nian iha mundu. Nia tenke ko’alia katak ha’u ba hetan prémiu Novél da Paz ha’u bele hadia TL iha mundu internasionál nia matan ida ne’e hanesan ezemplu ida, tanba  ba hetan prémiu ne’e prosesu ida ba luta povu nia di’ak,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here