Diretóra Ezekutiva JSMP, Ana Paula Marçal. Imajen Tatoli/Egas Cristovão

DILI, 02 outubru 2020 (TATOLI)-Organizasaun la’ós Governu nian hosi Programa Monitorizasaun ba Sistema Judisiál (JSMP-sigla inglés), iha loron 29 setembru tinan ne’e , realiza treinamentu ba membru estrutura suku Uma-Naruk, Postu Administrativu Laclo, Munisípiu Manatuto, kona-ba demokrasia no asesu ba justisa formál.

Iha treinamentu ne’e membru Konsellu Suku sira preokupa ho kazu insestu akontese durante ne’e.

Iha treinamentu ne’e JSMP fahe mós informasaun kona-ba oinsá halo prevensaun ba Covid-19 ne’ebé Governu liuhosi Ministériu Saúde no Organizasaun Mundiál  Saúde (OMS) introdús ona hanesan fase liman ho sabaun, uza máskara no kumpre distánsia fíziku.

Notísia Relevante : JSMP fó formasaun asesu justisa formal ba komunidade Laclo

Partisipante sira iha treinamentu ne’e mai hosi aldeia tolu; Aldeia Hali-lacor, Uma-surat no Uma-naruk ho totál partisipante hamutuk ema na’in-16 ne’ebé kompostu hosi feto na’in-hitu no mane na’in-sia.

“Membru Konsellu Suku sira kaer papél ne’ebé importante iha suku hodi halo atendimentu ba kualkér problema  kompleksu sira ne’ebé akontese iha sira-nia komunidade, tanba ne’e importante tebes atu sira hetan kapasitasaun no informasaun relasiona ho asuntu relevante sira hanesan ezemplu kazu insestu,” hateten Diretora Ezekutiva JSMP, Ana Paula Marçal, liuhosi nota komunikadu imprensa JSMP nian ne’ebé Agência Tatoli asesu, ohin, iha Dili.

Nia argumenta katak liuhosi mekanizmu sira hanesan ne’e bele hasa’e autoridade no konsellu suku sira-nia koñesimentu hodi sira bele dezempeña sira-nia knaar ho di’ak  no efetivu.

Materia ne’ebé mak aprezenta no diskute iha sesaun dahuluk kona-ba demokrasia nian mak kona-ba definisaun Estadu, saida mak estadu halo, prosesu halo lei no oinsá bele hola parte iha prosesu halo lei ne’e.

Matéria asesu ba justisa formál nian mak kona-ba definisaun direitu umanu no sistema justisa iha Timor-Leste.

Kestaun no preokupasaun sira ne’ebé partisipante sira koloka liga ho matéria demokrasia mak kona-ba diferensa entre sistema prezidensiál no semi-prezidensiál, kestaun kona-ba sistema demokrasia ne’ebé viola no la respeita ema seluk nia direitu, planu Governu atu harii edifísiu Parlamentu Nasionál.

Iha sesaun kona-ba asesu ba justisa formál, partisipante sira husu kona-ba krime ne’ebé aman halo relasaun seksuál ho nia oan rasik (insestu), no kazu inan no aman sira baku labarik sira tanba la rona inan-aman, karik ida ne’e kontra lei.

Hatán ba pergunta no preokupasaun sira ne’e, iha relasaun sistema prezidensiál no semi prezidensiál, JSMP esplika katak, sistema prezidensiál ne’e hanesan sistema ida ne’ebé opta demokrasia ida puru.

Iha sistema ida ne’e órgaun Estadu nian kompostu husi órgaun Estadu tolu de’it mak hanesan, órgaun ezekutivu, lejizlativu no judikativu.

Prezidente Repúblika iha sistema ida ne’e nu’udar xefe ezekutivu ka governu aleinde hanesan xefe Estadu, ezemplu mak hanesan Indonézia. Enkuantu sistema semi-prezidensiál mak Timor-Leste nia sistema ne’ebé órgaun estadu iha haat mak hanesan Prezidénsia Repúblika hanesan xefe estadu, Parlamentu Nasionál hanesan órgaun lejizlativu, Governu hanesan órgaun ezekutivu no Tribunál hanesan órgaun judisiáriu.

Liga ho hanoin sira kona-ba demokrasia ne’ebé fó liberdade ba ema atu viola no la respeita ema seluk nia direitu, JSMP esplika katak iha demokrasia liberdade iha nia limitasaun no responsabilidade. Laiha ema ida iha liberdade atu viola fali ka la respeitu ema seluk nia liberdade.

JSMP konsidera liberdade nu’udar valór ida hosi demokrasia ne’ebé asegura ema hotu livre espresa nia-aan, hanoin no hakarak sein prejudika ka viola ema seluk nia direitu. Tanba ne’e labele uza sala demokrasia hodi viola fali valór no prinsípiu direitu umanu ne’ebé konsagra iha Konstituisaun no mós lei internasionál sira ne’ebé Timor Leste adopta.

Iha relasaun ho preokupasaun kona-ba planu Governu atu harii edifísiu ba Parlamentu Nasionál, JSMP informa ba partisipante sira katak, inisiativa ida ne’e importante no relevante tebes ba serbisu Parlamentu nian tanba ida ne’e sei asegura no promove serbisu Parlamentu nian ho di’ak liután no efetivu.

Tuir observasaun JSMP nian, fasilidade sira Parlamentu nian la kondusivu atu deputadu sira bele hala’o sira-nia serbisu ho di’ak, tanba espasu la adekuadu, tanba JSMP hanoin katak Timor ne’e tenke ba oin, nune’e presiza iha dezenvolvimentu.

Pergunta sira kona-ba aman halo relasaun seksuál hasoru nia oan rasik, JSMP informa ba partisipante sira kona-ba esforsu sira ne’ebé JSMP no parseiru sira seluk halo kona-ba oinsá altera Kódigu Penál (KP) hodi kriminaliza insestu. Ida ne’e, tanba tuir KP oan ho idade menór de’it mak lei próteze ka kriminaliza sein haree ba idade no konsentimentu. Tanba ne’e, JSMP iha tinan barak halo esforsu hodi husu ba Governu atu halo alterasaun ba KP hodi kriminaliza insestu sein haree ba idade no konsentimentu.

Kestaun kona-ba inan-aman halo violénsia hasoru sira-nia oan, JSMP esplika katak hahalok ida ne’e krime públiku no kontra lei no esplika mós lei espesífiku ne’ebé regula krime sira ne’ebé akontese iha kontestu doméstika (familiár): Lei Kontra Violénsia Doméstika (LVKD). Tanba ne’e, hahalok hanesan aman baku oan konsidera krime ho natureza públiku ne’ebé la depende ba keixa, signifika katak se de’it mak rona, haree no hatene kona-ba krime ne’e akontese iha obrigasaun atu halo keixa no hahú hosi parte polísia, ministériu públiku no tribunál la bele halo konsiliasaun.

Xefe Suku Uma-Naruk, Estanislao de Carvalho, agradese ba JSMP bele hili suku Uma-Naruk hodi fahe informasaun importante sira ne’e, tanba atividade ne’e primeira vés hala’o iha sira-nia suku.

Programa treinamentu ne’e hetan apoiu hosi Governu Timor-Leste liuhosi Fundu Sosiedade Sivíl, Gabinete Primeiru-Ministru.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here