Sekretáriu Jerál Komité 12 Novembru, Sergio Filomeno Bento Marques. Imajen TATOLI/Osoria Marques.

DILI, 02 outubru 2020 (TATOLI)—Sekretáriu Jerál Komité 12 Novembru, Sergio Filomeno Bento Marques, hateten joven uluk no agora diferensa tebes tanba uluk joven hamutuk luta ba Timor-Leste ninia ukun rasik-aan maibé agora joven buka maka problema no hakarak fahe malu.

Nia hatutan, loloos ne’e agora Timor-Leste ukun-aan ona joven hakarak sente ukun rasik-aan ne’e ho loloos tenke hado’ok-aan hosi violénsia hotu-hotu, hodi fó liman ba malu labele kria problema.

“Prosesu joven uluk nia luta ne’e hasoru dezafiu oin-oin no lori tempu naruk maibé ho hanoin ida de’it hakarak ka lakohi tenke ukun rasik-aan ne’ebé loloos ne’e iha tempu ukun-aan nia laran ne’e joven sira hakarak sente ukun-aan ne’e ho loloos tenke hadook-aan hosi violénsia hotu-hotu,” dehan Sergio Filomeno Bento Marques liuhosi ninia diskursu bainhira sai oradór ba loron Mundiál Naun Violénsia, iha Uma Mahon Xanana Gusmão Reading Room, Largo Lecidere, Dili, sesta ne’e.

Nia hateten, joven sira atu redus violénsia maka hanesan tenke dook hosi problema, labele mete arte-marsiál, tratata ema maibé ho hanoin ida de’it katak Timor-Leste ukun-aan ona di’ak aproveita uza kapasidade nu’udár foinsa’e nian hodi hanoin fali ba rai ida-ne’e nia di’ak.

Sekritáriu Jerál Komité 12 Novembru ne’e dehan, arte-marsiál ne’e hanesan desportiva ida ba joven sira la’os atu uza ida-ne’e oho malu.

“Ita ko’alia loloos ne’e katak arte-marsiál ne’e hanesan atividade desportiva ida ne’ebé maka dezenvolve joven sira-nia mentalidade fíziku preparasaun atu defende rai ida-ne’e bainhira nasaun seluk mai atu destroi hodi defende la’os atu uza ba buka problema hodi oho malu,” nia dehan.

Tanba ne’e, nia husu ba Governu kata agora daudaun joven uza fali arte-marsiál hosi hamosu no rezolve problema, Estadu tenke halo regulamentu rigorozu ida atu nune’e joven sira labele uza fali arte-marsiál hodi estraga nasaun ka estadu ne’ebé uluk sosa ho raan ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here