Komandante Ein-Xefe FALINTIL, Kay Rala Xanana Gusmão akompaña hosi Reprezentante Forsa Austrália, Carl Capper, halo abertura segundu jogu amizade FALINTIL no INTERFET iha estádiu Munisipál Dili, 02 outubru 2020. Imajen Tatoli/Eugénio Pereira

DILI, 02 outubru 2020 (TATOLI)- Komandu FALINTIL-Forsa Defeza Timor-Leste (F-FDTL) no Komandu Forsa Armanda Australianu, ohin, halo abertura jogu amizade FALINTIL no INTERFET ba daruak iha Estádiu Munisipál Dili.

Notísia Relevante : FALINTIL no INTERFET Impata 1-1

Jogu amizade forsa armada rua ne’e abertura direita hosi Lider Karizmátiku no Komandante Ein-Xefe FALINTIL, Kay Rala Xanana Gusmão, Vise Xefe Estadu Maiór Jenerál F-FDTL, Brigadeiru Jenerál Falur Rate Laek no reprezentante Forsa Australianu, Carl Capper.

Xanana hasai foto ho ekipa FALINTIL. Imajen Tatoli/Eugénio Pereira

Iha primeira etapa jogu hahú iha minutu 45, ekipa forsa INTERFET ne’ebé kompostu hosi jogadór komandante no ofisiál militár sira hosi Austrália, Nova Zelándia, Portugál no Estadus Unidus Amerika konsege fura uluk golu rua, no ekipa FALINTIL zero too jogu termina.

Tama ba segundu jogu, liu minutu balun, ekipa jogadór INTERFET ho fíziku mesak boot no altura, kontinua marka tan golu ida hodi lori ekipa avansa ho golu 3-0 hodi halo ekipa FALINTIL ne’ebé Komanda hosi Brigadeiru Jenerál Falur Rate Laek kontinua konsolida forsa ekipa luta nafatin.

Mezmu jogu ne’e iha loron manas maka’as, maibé ekipa INTERFET ne’ebé avansa ona ho golu 3 sente kontente, maibé mós ekipa FALINTIL la lakon esperansa hodi kontinua konsolida forsa, liuhosi esforsu Kapitaun Adobu, marka golu rua tuituir malu hodi lori ekipa FALINTIL avansa ho golu 2. Nune’e, jogu kontinua hahú, iha minutu ikus, ekipa FALINTIL mós konsege hatama tan golu ida hodi lori ekipa Lafahek no Kanguru impata ho golu 3-3.

Xanana hasai foto ho ekipa INTERFET. Imajen Tatoli/Eugénio Pereira

Haree jogu ne’ebé envolve hosi komandante ativu F-FDTL- INTERFET ho idade mesak katuas de’it, Xanana dehan, jogu ne’e la iha ekipa ida maka manan no lakon, maibé importante liu maka forsa rua hametin nafatin sira nia lasu amizade no unidade nafatin hanesan tinan 21 liubá.

Xanana tatoli tan, jogu amizade ne’e kada tinan tenke selebra hodi hametin lasu amizade FALINTIL-FDTL no INTERFET hodi hanoin hikas amizade forsa nasaun hotu tama iha misaun INTERFET mai instala moris dame ba povu Timor-Leste.

Nia hatutan, mezmu jogu ne’e Komandante INTERFET, Peter Cosgrove ho komandante sira seluk, labele mai, no jogu ne’e mós labele partisipa hosi povu barak, tanba problema surtu COVID-19.

“Razaun no motivu, tanbasá maka tinan-tinan ita halo jogu ida ne’e, tanba hakarak hato’o de’it, obrigadu ba partisipasaun forsa INTERFET nian. Jogu ne’e Komandante Peter Cosgrove no Embaixadór mós iha hela Darwin labele mai. Mais ita husu nafatin jogu ne’e kaer metin, konsolida nafatin relasaun di’ak ne’ebé ita iha ho rai hotu ne’ebé mai ajuda ita,” dehan Xanana iha nia diskursu.

Xanana husu deskulpa ba povu sira labele hirus, tinan ne’e, abertura jogu amizade daruak halo la konvida povu nasaun rua atu partisipa hanesan selebrasaun tinan kotuk iha 2019 nian, maibé ba tinan oin 2021, Xanana sei konvida nafatin INTERFET no povu tomak atu asiste jogu ho rame liután.

“Tinan oin kuandu COVID-19 la iha ona, ita sei halo rame liután,” Xanana hateten.

Xanana mós agradese tanba jogu ne’e la’o kapás tebes, mezmu forsa rua mesak idade katuas de’it.

“Rezultadu ita hotu manan, e parabens, parabens,” Xanana hateten.

Iha fatin hanesan, Vise Xefe Estadu Maiór Jenerál F-FDTL, Brigadeiru Jenerál Falur Rate Laek dehan, jogu amizade FALINTIL no INTERFET envolve veteranu ativu F-FDTL hodi komemora loron INTERFET nian ba dala-21.

“Ita realiza jogu ne’e atu hakru’uk no agradese ba INTERFET sira misaun, 20 setembru 1999, ne’ebé sira mai hodi ajuda ita liberta no fó salvasaun ba ita hosi okupasaun Indonézia,” Falur agradese.

Lori naran Komandu F-FDTL, Falur hato’o agradese ba partisipasaun nasaun hotu- hotu inklui partisipasaun Komandante Ein-Xefe FALINTIL, Xanana Gusmão ne’ebé sempre fó ninia motivasaun hodi apoiu FALINTIL atu la’o ba oin ho forsa ida profisionál atu partisipa iha kualkér misaun iha rai laran no ba misaun dame ONU nian iha futuru.

“Eventu hanesan ne’e sei la’o ba oin, ita nia maun Boot Kay Rala Xanana Gusmão marka prezensa iha ne’e hatudu nafatin ninia prezensa hodi fó brani nafatin ba jerasaun sira ikus mai atu hatene, ita nia valór istória sira ne’e iha nia fatin loloos,” nia hateten.

Jogu ne’e partisipa mós hosi Ministru Asuntu Kombatente Libertasaun Nasionál, Júlio Sarmento da Costa “Meta Mali”, Adidu Defeza Australia iha Timor-Leste, ofisiais F-FDTL no komunidade internasionál balun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here