Koodenadora Asisténsia Vítima Iha Organizasaun Forum Komunikasaun ba Feto Timor-Leste (FOKUPERS), Dália das Regras. Imajen TATOLI/Osoria Marques.

DILI, 02 outubru 2020 (TATOLI)–Koodenadora Asisténsia Vítima Iha Organizasaun Forum Komunikasaun ba Feto Timor-Leste (FOKUPERS), Dália das Regras, hateten FOKUPERS nia vizaun no misaun maka atu lolo liman ba feto maluk sira ne’ebé maka kbiit laek tanba ne’e kontinua nafatin fó asisténsia direta ba feto no labarik sira atu hetan sira-nia diretu ho dignu.

“FOKUPERS nia vizaun no misaun maka lolo liman ba feto maluk sira ne’ebé maka kbi’it laek, atu nune’e sira bele hetan sira nia diretu hotu ho dignu no kontinua halo servisu fó asisténsisa direta ba feto no labarik sira ne’ebé sai vitima,” dehan Koodenadora Asisténsia Vítima Iha Organizasaun Forum Komunikasaun ba Feto Timor-Leste (FOKUPERS), Dália das Regras, liuhosi ninia aprezentasaun bainhira sai oradór iha seminariu kona-ba loron Mundiál Naun Violénsia, ne’ebé realiza iha Uma Mahon Xanana Gusmão Reading Room, Largo Lecidere, Dili, sesta ne’e.

Nia afirma, durante FOKUPERS aliende fó asisténsia ba feto maluk sira no sira mós oinsá atu prevene ba maluk vítima sira liuhosi programa ida naran konsiensilizasaun.

“Ami la’os halo de’it asisténsia ba vítima sira maibé ami halo mós asistensia ba atu kura nian, lihosi atividade prevensaun liuhosi programa ida naran konsinsializasaun. Programa ne’e ho nia objetivu atu konsimsializa ba sosiedade, komunidade no familia liu-liu individu, atu nune sira bele halo mudansa ba ida-idak nia aan,” nia dehan.

Tanba, nia dehan, violénsia atu lakon liuhosi konsiensializasaun mak bele fahe informasaun no hosi ne’e bele halakon violénsia ne’e. Tanba atu halo mudansa ba aban no bain-rua nian tenke hahú hosi agora mak desizaun konsiénsializasaun ne’e ezisti hodi konsiénsializa sosidade sira.

“Ita halo tiha konsiénsializasaun maibé injustisa komesa la’o nafatin no kontinua la’o iha ita nia sosidade sira, halo nusa feto sira bele hetan sira-nia diretu. Se sira laiha oportunidade atu bele hakle’an sira-nia diretu entaun ami mós halo advokasia atu bele haree ba injustisa ne’ebe akontese ba vitima feto no labarik sira,” nia dehan.

Advokasia ne’ebé FOKUPERS halo, tuir nia, la’os ba de’it iha nivél sosidade no komunidade sira maibé FOKUPERS mós halo esforsu, sira bele muda polítika ruma ne’ebé maka ladún fó benefisiu ba feto no labarik sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here