Reprezentante Kompañia Duta Xerox Arnaldus Wea entrega livru kódigu estrada ba Segundu Komandante PNTL Dili, Superintendente Euclides Belo. Imajen Tatoli/Eugénio Pereira

DILI, 02 outubru 2020 (TATOLI)- Kompañia Duta Xerox servisu hamutuk ho Komandu Polísia Munisípiu Dili, Seksaun Tránzitu, prodús livru Kódigu Estrada nian hodi fó apoiu ba membru polísia sira atu estuda no sensibiliza informasaun no regra kódigu estrada ho sinais tránzitu ba sosiedade Timor-Leste.

Livru kódigu estrada tuir Dekretu-Lei númeru 6/2003, loron 03  abríl ho pájina 100-liu, ko’alia liu kona-ba servisu PNTL nian hodi implementa lei no kontrola regra kódigu estrada hodi kontrola sidadaun sira uza transporte respeita sinais tránzitu nian hodi bele kontribui redús no minimiza kazu asidente tráfegu iha kapitál Dili.

Livru 50 ne’e entrega direita hosi reprezentante Kompañia Duta Xerox, Arnaldus Wea ba Segundu Komandante Polísia Munisípiu Dili, Superintendente, Euclides Belo, akompaña hosi Komandante Tránzitu Munisípiu Dili, Inspetór Domingos Soares Gama.

Euclides dehan, livru ne’e hanesan bíblia polísia nian sei fahe ba membru tránzitu sira hotu- hotu obrigatóriu tenke lee, atu nune’e, bainhira hala’o atividade pasa revista ba transporte públiku, polísia uza lei maka regula motorista hotu-hotu.

“Livru ne’e hanesan bíblia polísia nian atu polísia uza para kontrola ita-nia sosiedade sira ne’ebé utiliza karreta no motór,” dehan Euclides Belo ba jornalista iha Komandu PNTL, Caicoli, Dili.

Euclides hato’o agradese ba kompañia Duta Xerox ne’ebé voluntáriu hodi prodús livru ne’e, no ba oin PNTL sei halo kooperasaun di’ak atu kontinua prodús nafatin livru hodi PNTL sosializa informasaun ne’e ba estudante universitáriu sira no sosiedade.

Nia hatutan, bainhira ema hotu- hotu kontribui no respeita regra sei hamenus asidente tráfegu no la viola regra no la komete infrasaun.

“Ita hakarak ita-nia sosiedade labele komete iha asidente, insidente no infrasaun, tanba ne’e, ita halo esforsu maka’as para sensibiliza regra ne’e ba sira,” tenik nia.

Komandu PNTL rasik durante ne’e halo avaliasaun, sidadaun barak komete iha infrasaun no hasoru asidente tráfegu, tanba la hatene informasaun kona-ba utiliza espasu estrada públiku no lei sira.

Iha fatin hanesan, Reprezentante Kompañia Duta Xerox, Arnaldus Wea dehan, sira prontu koopera nafatin hodi ajuda PNTL liuhosi produsaun livru ba manual kódigu estrada.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here