Deputadu Patrocínio dos Reis Fernandes. Imajen/Espesial.

DILI, 02 outubru (TATOLI)—Bankada Congesso Nacional da Reconstrução de Timorense (CNRT) seidauk bele fó votu favorável iha proposta Orsamentu Jerál Estadu (OJE) 2020 iha jeneralidade tanba sei hein esplikasaun kle’an iha debate espesialidade.

“Hó razaun legál no haree hosi inkapasidade governu, iha ezekusaun no laiha sentidu estadu atu halo polítika poupansa ne’ebé ami esplika liubá, bankada CNRT foti pozisaun katak iha jeneralidade seidauk bele fó votu favorável ba proposta Orsamentu Jerál Estadu 2020. Espera katak, ba debate espesialidade bele hetan explikasaun di’ak no onesta,” Vise-Xefe Bankada CNRT, Deputadu Patrocínio Fernandes dos Reis, informa liuhosi plenária, molok tama ba votasaun debate loron ikus jeneralidade, sesta ne’e.

Razaun bankada CNRT maioria vota abstensaun 21 tanba problema boot ne’ebé mosu iha audiénsia ne’ebé hala’o ona mak ministru sira afirma katak la’ós sira mak tau osan, la’ós sira mak hakerek programa, tanba UPMA mak halo mesak, sein konsulta sira, hodi ministru balun mós nein koñese ema sira-ne’ebé kaer ukun iha UPMA.

Deputadu Patrocínio ne’e esplika,   ezisténsia VIII Governu ida-ne’e viola Konstituisaun RDTL no viola Lei Orsamentu no Jestaun Finanseira (LOGF-sigla portugés) artigu 30 kona-ba prazu aprezentasaun OJE tanba númeru 1 hosi artigu hateten, “Governu aprezenta ba Parlamentu Nasional, to’o loron 15 Outubru, proposta de lei Orsamentu ba tinan finanseiru tuir mai”.

 Bankada CNRT konsidera prazu atu aprezenta OJE 2020 mak monu (mais tarde) iha loron 15 outubru 2019, maibé ohin, loron 02 outubru 2020 LOGF la fó fatin ba VIII Governu atu aprezenta OJE ba iha Parlamentu Nasionál.

“Lei Orsamentu no Jestaun Finanseira, iha ninia artigu 30 númeru 2 hakerek momoos katak prazu ba aprezentasaun orsamentu nebé mensiona iha númeru 1 husi artigu 30 ne’e, só aplika bainhira Governu em funsaun hetan demisaun no mosu tomada de posse ba Governu foun, nomoos mosu lejizlatura foun,” nia dehan.

Bankada CNRT konsidrea proposta OJE 2020 ho montante biliaun $1.497,1 ne’e kompara ho OJE 2019 ho montante biliaun $1.241,5, tuir alokasaun ba tabela ezekusaun duodesimál 2020 hatudu iha aumentu 21,4% iha proposta OJE 2020 tanba ezekusaun OJE 2020, iha fulan 9, ezekuta de’it 49% no restu 51% (millaun $) atu ezekuta iha fulan-novembru no dezembru 2020, tuir data submisaun de orsamentu nian.

“Kestaun maka ne’e, iha fulan 9 nia laran, uza de’it osan metade orsamentu ne’ebé la uza ne’e bele gasta iha fulan-rua nia laran ka lae,” Bankada CNRT dúvida.

Preokupasaun Bankada CNRT nian mak orsamentu liu metade proposta OJE 2020  millaun $745 ne’e bele ka lae ezekuta iha fulan-rua nia laran, kuandu, iha fulan 9, só bele ezekuta de’it millaun $526,9?.

Jornalista: Evaristo Soares

Editór: Cancio Ximenes

HAKEREK NO HATÁN

Please enter your comment!
Please enter your name here