Xefe Bankada CNRT, Duarte Nunes. Imajen/Egas Cristovão

DILI, 02 outubru 2020 (TATOLI)—Bankada Conrrsso Nacional de Reconstrução De Timorense (CNRT) husu pozisaun Primeiru-Ministru Taur Matan Ruak nia pozisaun kona-ba prosesu dezenvolvimentu Greater Sunrise.

Notísia Relevante: PD propoin konsensu nasionál ba Greater Sunrise

Xefe Bankada CNRT, Deputadu Duarte Nunes, afirma se haree ba kestaun mina tanba Deputadu Adriano do Nascimento fó-sai horisehik katak povu nia moris mak mina.

Tuir Xefe Bankada ne’e ninia observasaun ba líder na’in-rua (Xanana-Alkatiri) pozisaun sira-ne’e antagónika, ida hakarak ba Austrália no ida hakarak dada kadoras mai Timor-Leste, signifika pozisaun hosi líder na’in-rua la hanesan.

Nia afirma, mina ne’e rikusoin povu nian, povu tenke hatene no povu nia hakarak mak ida-ne’ebé. Se ita hotu la hatene ida ba Austrália no ida dehan mai iha-ne’e (Timor-Leste) nusá mak Governu la organiza hodi husu ba povu nia hakarak saida loos nune’e mandatu ne’ebé povu fó, hotu-hotu kumpre mandatu ne’e.

 “Se lae, ida-idak hanoin ninian entaun ida-ne’ebé mak loos. To’o agora ha’u seidauk rona hosi señor Primeiru-Ministru hanesan líder ida-nia pozisaun to’o agora ita seidauk hatene. Hosi na’in-rua ne’e ita hatene ona nune’e bele iha solusaun,” Xefe Bankada CNRT, Duarte Nunes, levanta liuhosi plenária Parlamentu Nasionál, iha ámbitu debate proposta Orsamentu Jerál Estadu (OJE) 2020 iha faze loron daruak, sesta ne’e.

Xefe Bankada CNRT ne’e hatutan, bainhira Xanana no Alkatiri tuur hamutuk iha situasaun hanesan ne’e atu ko’alia saida kona-ba mina (Greater da Sunrise) ne’e.

Ho situasaun hirak ne’e, Xefe Bankada CNRT, Deputadu Duarte Nunes husu ba Governu buka meiu oinsá fó solusaun.

Akordu ne’ebé Timor-Leste no Austrália asina iha sede Organizasaun Nasaun Unida (ONU), ne’ebé iha aneksu B (Rejime espesiál Greater Sunrise nian) artigu 2 (Propriedade kona-ba Petróleu no partilla reseita sira-nian) alínea 1, hateten Petróleu hotu ne’ebé produzidu iha kampu sira Greater Sunrise ne’e propriedade Timor-Leste no Austrália nian.

Alínea 2 hosi artigu 2, mensiona parte sira tenke partilla reseita sira hosi upstream, ka reseita sira direitamente rezultante hosi explorasaun upstream petróleu produzidu nian iha kampu sira Greater Sunrise.

Hosi artigu 2 mak define proporsaun hanesan tuir mai ne’e.

a). Iha proporsaun 70 porsentu ba Timor-Leste no 30 porsentu ba Austrália, sé hosi kampu sira Greater Sunrise sei dezenvolvidu liuhosi Gazodutu ida ba Timor-Leste, ka

b). Iha proporsaun 80 porsentu ba Timor-Leste no 20 porsentu ba Austrália, sé hosi kampu sira Greater Sunrise sei dezenvolvidu liuhosi Gasodutu ida ba Austrália.

Bainhira termina tiha opsaun rua ne’e entre Timor-Leste no Austrália hafoin tama ba tributasaun, kontratu partilla nian hosi produsaun Grater Sunrise nian, estabelese entidade regulatória sira, autoridade dezignada, konsellu supervizaun, komité rezolusaun litíjiu sira no foin tama ba planu dezenvolvimentu ba greater sunrise. Hosi planu dezenvolvimentu greater sunrise tama tán ba prosesu atu gazodotu sira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here