Ilustrasaun Google

DILI, 02 outubru 2020 (TATOLI)- Família no populasaun sira iha área Aimutin, São Jose, Suku Comoro, Postu Administrativu Don Aleixo, Munisípiu Dili, ohin dadeer, hafodak rona no haree katuas ida ho naran Andre da Costa Silva, tinan 67, mate ho kondisaun tara aan iha uma kotuk besik fahi-luhan.

Vítima Andre moris iha Aldeia Samalari, Postu Administrativu Laga, Munisípiu Baucau, iha loron 7 marsu 1953.

Vítima nia mate isin família sira hetan iha tuku 6:00 madrugada, ho kondisaun mate ona, tanba tali aperta metin ninia kakorok.

Segundu Komandante Polísia Munisípiu Dili, Superintendente Euclides Belo, informa ekipa forensik PNTL to’o kedas fatin hodi halo investigasaun.

“Katuas ida ohin mate tara aan iha área Aimutin nia orijen hosi Laga-Baucau. Ita nia polísia sira sei halo investigasaun para buka hatene ninia motivu loloos,” informa Superintendente, Euclides Belo ba jornalista iha Komandu PNTL, Caicoli, Dili.

Euclides dehan, parte PNTL rasik seidauk hatene klaru motivu vítima nia mate, tanba sei rekolla hela dadus hosi sasin inklui família sira.

Daudaun ne’e mate isin lori ona ba Ospitál Nasionál Guido Valadares (HNGV) hodi hein ekipa Polísia Forensik Nasionál no médiku sira hala’o tiha autópsia foin entrega mate isin ba família sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here