DILI, 02 outobru 2020 (TATOLI)-Alumni husi bolseiru Korea International Cooperation Agency (KOICA), iha sesta ne’e fahe sira-nia matenek ba estudante enjinária Universidade Orientál Timor Lorosa’e (UNITAL), hamutuk ema na’in 100 kona-ba planeamentu urbana iha Timor-Leste (TL).

Prezidente Asosiasaun Alumni KOICA iha TL, Gil Boavida, hateten nia ho ninia kolega na’in tolu seluk hakarak fahe matenek ba estudante sira kona-ba asuntu ne’e tanba sistema planeamentu urbana iha Timor-Leste sei kompleksu liu.

Notísia Relevante :Dekretu-Lei Tolu ba Planu Urbanu Iha Faze Konsultasaun Nível Ministeriál

Atu hetan planu urbanizasaun ida di’ak maka nia rekomenda ba entidade hotu-hotu hanesan polítiku sira, akadémiku, sosiedade sivíl hodi fó kontribuisaun ba Governu nune’e bele kria planu ne’e iha futuru.

“Primeira vez ita mai partilla koñesimentu ba alin estudante sira iha UNITAL kona-ba planeamentu Urbana ne’e atu tau hanoin hamutuk sa planu ideál saida mak di’ak ba ita-nia rain liliu iha Dili,” dehan nia ba jornalista sira iha UNITAL Dili.

Programa ne’e realiza tanba hetan kooperasaun dahuluk entre KOICA ho UNITAL ho objetivu atu hamosu rekomendasaun no idea balun nune’e bele hato’o ba Governu no Estadu hodi konsidera iha sira-nia planeamentu urbana.

Iha fatin hanesan Magnífiku Reitór UNITAL, Florindo Pereira, hateten orgullu ho programa KOICA nian tanba bele tulun estudante sira atu hatene kle’an kona-ba polítika ba planeamentu urbana ida di’ak.

“Ita orgullu tanba sira bele mai ajuda fahe esperiénsia ne’e ba ita-nia alin sira iha UNITAL tanba bele ajuda ita-nia alin sira-nia esperiénsia naton atu  halo mós planu ida di’ak iha futuru,” katak nia.

Nia observa katak, Timor-Leste seidauk iha planu urbanizasaun ida integradu entre kanalizasaun bee moos, Estrada, eletrisidade no seluk tan.

Entretantu, iha fulan marsu liubá Ministériu Obra Públika (MOP) aprezenta ona Dekretu-Lei tolu hanesan lei jestaun territoriál, klasifikasaun uzu solu no urbanizasaun inklui edifikasaun ba Konsellu Ministru hodi distribui ba kada ministrériu atu fó kometáriu, hafoin aprova iha nível ezekutivu sira atu halo planeamentu urbana Timor-Leste ninian.

Notísia Relevante :MOP Sei Koordena ho MPOT Diskute Dekretu-Lei Tolu ba Planu Urbana

Jornalista : Tomé Amado

Editór : Agapito dos Santos

HAKEREK NO HATÁN

Please enter your comment!
Please enter your name here