Sigarru Surya 12 stiker. Imajen/foti hosi Google

DILI, 01 outubru 2020 (TATOLI)-Tribunál Distritál Dili (TDD), ohin, adia julgamentu ba kazu krime importasaun ilísita ba sasán merkadoria.

Juis titular Ivan Suritai, esklarese tuir loloos  prosesu julgamentu ne’e hala’o ohin hodi rona deklarasaun arguidu no sasin sira, maibé la bele realiza tanba arguidu ida la marka prezensa, tanba tuir lei obrigatória kuandu julgamentu la’o arguidu hotu tenke marka prezensa.

“Iha difikuldade ita-nia ofisial justisa sira la notifika arguidu RTS  tanba buka paradeiru la hetan,” hateten juis Ivan Suritai iha sala julgamentu TDD.

Nia parte orienta ofisial justisa oinsá koopera ho Ministériu Públiku no parte sira seluk hodi identifika loloos paradeiru arguidu RTS nian no tuir lei kuandu iha prosesu ne’e ba oin la konsege identifika maka  sei tau arguidu hanesan editál. Nune’e, Juis Ivan Suritai, deside adia fila-fali julgamentu ne’e ba loron 26 novembru, tinan ne’e, iha tuku 9:00 dadeer.

Ba kazu ne’e ,Ministériu Públiku (MP)  rejista ba krime importasaun  ilísita ba sasán mekadoria ne’ebé previstu  no punidu iha artigu 315 númeru 1 hosi kódigu penál Timor-Leste.

Natureza hosi kazu ne’e, arguidu sira nu’udar negosiante fa’an tabaku ilísitu  ho marka surya 12 (stiker) total iha slop 80 no  sigarru ho marka Tembakau Cheg iha kaixa 14, no mós arguidu halo importasaun sasán merkadoria hirak ne’e laiha lisensa hosi parte kompetente. Ho nune’e, ekipa inspesaun hosi Autoridade Inspesaun Fiskalizasaun Ekonomia no Sanitária (AEFAESA) identifika hodi halo apreensaun direita.

Timor-Leste seidauk iha fabrika ida própriu atu halo produsaun tabaku ho marka Tembakau Cheg no sigarru surya 12 uza stiker, no sigarru sira-ne’e tuir artigu 31 alínea c no artigu 12 númeru 9, hosi dekretu lei númeru 14/2016 8 juñu, konsidera nu’udar produtu tabaku ilísitu ne’ebé proibidu atu sirkula iha merkadoria.

Kona-ba faktu kompletu, Tribunál seidauk lee sai akuzasaun, tanba Tribunál adia julgamentu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here