Prezidente Komisaun C (Finansa Públika), Deputada Maria Angélica Rangel. Imajen/Egas Cristovao.

DILI, 01 outubru 2020 (TATOLI)—Prezidente Komisaun C (Finansa Públika) iha Parlamentu Nasionál, Deputada Maria Angélica Rangel hateten, Timor-Leste tenke sai hosi rejime duodesimál no tenke sai hosi impase polítiku.

Molok hato’o relatóriu no pareser, Prezidente Komisaun C (Finansa Públika), Deputada Maria Angélica Rangel, hateten kuaze tinan rua Timor-Leste moris ho rejime duodesimál tanba kauza hosi aktu no desizaun sira-ne’ebé timoroan hotu tenke responsabiliza tantu pasivu no ativu.

Maibé nia dehan, ohin, iha fukun ida-ne’e hatudu matenek no sensibilizasaun ba povu nia moris hodi halo apresiasaun ba Orsamentu Jerál Estadu (OJE) 2020.

“Ho hanoin ida katak Timor-Leste tenke la’o nafatin bá-oin iha aspeitu vida tomak. Tan ne’e rekere ita hotu nia seriedade, ita-nia análize ne’ebé kle’an. Ikus liu atu desizaun ne’ebé nakonu ho esperansa no espetativa atu hateten lae ba duodésimu nune’e ajuda rekupera fali esperansa no lalais povu RDTL sai hosi impase polítiku ida-ne’e,” Prezidente Komisaun C informa liuhosi plenária, Parlamentu Nasionál, kinta ne’e.

Iha debate faze jeneralidade ba proposta OJE 202O ne’e parte Governu nian lidera direitamente hosi Primeiru-Ministru, Taur Matan Ruak, Vise-Primeiru-Ministru na’in-rua no membru Governu tomak.

Nune’e mós hosi parte Parlamentu Nasionál nian prezide plenária lidera hosi Prezidente Parlamentu Nasionál, Deputadu Aniceto Longuinhos Guterres Lopes no membru parlamentu sira hotu.

Debate iha faze jeneralidade loron dahuluk ne’e ba despeza ho montante orsamentu biliaun $1.497,1 prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Montante orsamentu biliaun $1.497,1 ne’e,  Governu ezekuta ona balun hahú hosi janeiru to’o setembru 2020 liuhosi Dotasaun Temporáriu Orsamentál (DOT).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here