Komandante Polísia Munisípiu Dili, Superintendente Xefe Henrique da Costa. Imajen Tatoli/Dok.

DILI, 01 outubru 2020 (TATOLI)- Suspeitu ho inisiál NJX, tinan 30, rekoñese ninia atitude lori tudik sona kanek ninia kolega di’ak vítima SD iha parte kabun, tanba lamenta ho vítima hatama osan la too tuir kuantidade ne’ebé nia hakarak.

Kronolojia kazu tentativa omisídiu ne’e akontese iha tersa (29/09/2020), oras 19:00 kalan, iha área Terminál Tasi Tolu, Raikotu, Suku Comoro, Postu Administrativu Don Aleixo, Munisípiu Dili.

Komandante Polísia Munisípiu Dili, Superintendente Xefe, Henrique da Costa, hateten  hafoin akontesimentu, PNTL detein kedas suspeitu no evakua mós vítima ba ospitál.

Suspeitu NJX nu’udar kondutór karreta mikrolete 10 ne’e entrega karreta ba nia kolega lori tula pasajeiru hosi dadeer too lokraik, maibé tanba vítima la fó osan kompletu (Polísia la informa osan nia valor detallu) hodi halo sira haksesuk malu, ikus mai suspeitu nervozu hodi losu tudik sona hasoru kedas vítima.

“Kazu ne’e ninia motivu la’ós tanba buat seluk, maibé tanba de’it osan setoran la to’o mak suspeitu ne’e nervozu hodi tudik sona vítima nia kabun no polísia to’o kedas fatin akontesimentu hodi detein suspeitu,” hateten Komandante Henrique da Costa, liuhosi konferénsia imprensa iha Komandu PNTL, Caicoli, Dili.

Nia dehan, vítima SD nu’udar kondutór kazuál ne’ebé hetan fiar hosi suspeitu hodi lori karreta too lokraik tenke estore osan tuir alvu, maibé pelu kontráriu vítima hatama osan la to’o hodi hamosu problema tentative omisídiu ne’e.

Daudaun ne’e suspeitu detein hela iha sela Polísia Munisípiu Dili hodi hein prosesu investigasaun oras 72 depois aprezenta ba Ministériu Públiku.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here