Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál, kinta (01/10). Imajen Tatoli/Egas Cristovão

DILI, 01 outubru 2020 (TATOLI)–Iha aprezentasaun Proposta Lei Orsamentu Jerál Estadu (OJE) 2020 ba datoluk iha faze jeneralidade, Primeiru-Ministru (PM), Taur Matan Ruak, nota katak fulan-sanulu ikus Governu hasoru krize tolu.

“Fulan-sanulu ikus ita koñese hanesan tinan ho impase polítika, dezastre naturál no krize COVID-19, maibé ha’u fiar ho orsamentu no medida ne’ebé hala’o, ita sei ramata tinan ne’e ho fiar metin sai koñesidu hanesan tinan rezisténsia no reziliénsia povu Timor-Leste ninian,” relata Xefe Governu iha loron dahuluk debate faze jeneralidade iha sala plenáriu, Parlamentu Nasionál (PN), kinta ne’e.

Xefe ezekutivu ne’e dehan, tinan rezisténsia hahú kedas hafoin surtu dahuluk ho programa estabilizasaun ekonómika no sosiál ne’ebé ambisiozu ho pakote estímulu ekonómiku ida, kompostu hosi medida konkreta iha kurtu no longu prazu atu hamenus efeitu krize ne’ebé mosu iha nasaun ne’e.

“Medida sira sei fó tulun ema sira no uma-kain timor-oan hamutuk 298.000-resin ho subsídiu diretu, hodi injeta fonte rendimentu ne’ebé krusiál atu hamenus hamlaha no moris-kiak, iha momentu ne’ebé akontese suspensaun atividade ekonómika hodi halakon rendimentu no dezempregu sira sa’e,” nia informa.

Notísia Relevante: Komisaun planu rekuperasaun ekonómika rekomenda medida 71 hosi sub-setór ualu

Rekuperasaun ekonómika: prevee millaun $113,4 ba medida haat kurtu prazu

Tuir PM, medida ne’ebé dezeña ona justifika kriasaun fundu COVID-19 ida atubele hatán ba problema no nesesidade operasionál inklui lojístika, ne’ebé obriga atu kria sistema ba vijilánsia, detesaun no referénsia ba kazu suspeitu virus, ba sentru kuarentena, izolamentu no rekuperasaun pasiente nian sira.

“Ita koloka iha medida hirak ne’e poupansa hamutuk besik porsentu 14, ne’ebé hetan hosi restrisaun hirak ne’ebé impoin iha ezekusaun iha rejime dotasaun orsamentál sira durante fulan-sanulu, tanba medida sira reprezenta aumentu signifikativu hosi rekursu sira ne’ebé disponível ba konkretizasaun moris di’ak sosiál no ekonómiku ema sira,” Xefe Governu akresenta.

Tinan reziliénsia ne’ebé fini sei kontinua kari iha fulan sira tuirmai, ne’ebé ninia efeitu sei dada to’otinan tuirmai, ho inísiu hosi implementasaun medida ne’ebé propoin husi Planu Rekuperasaun Ekonómika ne’ebé aprezenta ona iha fulan-agostu husi Komisaun ida kompostu husi péritu no espesialista timor-oan sira.

Tuir PM, medida sira fó oportunidade atu hatán la’ós de’it ba problema ne’ebé mosu tanba pandemia COVID-19, maibé bele hahú dalan loos ne’ebé bele hatán iha prazu médiu no prazu naruk ba problema estruturál ne’ebé sei limita dezenvolvimentu nasaun ne’e nian.

“Ha’u fiar hanesan orsamentu rezisténsia no reziliénsia nian ne’ebé maka programa, medida no resposta ne’ebé aprezenta hatudu momoos ezekusaun orsamentál iha fulan-sanulu nia laran, ne’ebé kontribui ativamente atu hamenus impaktu negativu sira ne’ebé maihosi impase polítiku, dezastre naturál sira no krize COVID-19 atubele hatán ba nesesidade urjente no estabiliza sosiedade no ekonomia iha momentu resesaun no kontrasaun ekonomia ida ne’ebé akontese iha nasaun hotu iha mundu,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here