DILI, 01 outubru 2020 (TATOLI)—Iha diskusaun faze jeneralidade ba Proposta Orsamentu Jerál Estadu (OJE) 2020, Primeiru-Ministru (PM), Taur Matan Ruak, realsa importánsia entendimentu no konsensu entre timor-oan hotu.
“Ita-nia país presiza nia oan sira hotu, tanba ne’e presiza iha baze entendimentu ida forte no konsensu, tanba hosi hamutuk maka ita bele forte liután,” dehan Xefe Governu iha loron dahuluk diskusaun iha sala plenáriu, Parlamentu Nasionál (PN), kinta ne’e.
PM Taur dehan, Timor-Leste ninia perkursu eróiku rezisténsia, tenasidade, persisténsia no esperansa inkestionável.
“Perkursu ne’ebé lori ita ba restaurasaun independénsia no perkursu ne’ebé ita halo ona atu harii neineik maibé firme hosi baze, ba Estadu Direitu Demokrátiku Timor-Leste ho ekonomia abilitada liután atu garante oportunidade hanesan ba sidadaun hotu no hatutan moris ho kualidade liután,” ia akresenta.
Liuhosi biban ne’e, Xefe Ezekutivu reafirma empeñu kontinua nafatin ho serbisu Governu no husu apoiu aprovasaun orsamentu hosi PN atu Estadu bele mobiliza reseita hodi ezekuta despeza públika ba tinan 2020 ho montante billaun $1,497.
Despeza ne’e hosi millaun $671,292 korresponde ba valór totál ezekutadu entre janeiru to’o 30 setembru 2020, millaun $117,1 korresponde totál Dotasaun Orsamentu temporáriu ne’ebé prevee ba outubru iha ambitu rejime duodesimál, no millaun $708,708 korresponde ba valór totál orsamentu previstu atu ezekuta entre novembru no dezembru 2020.
Biban ne’e, PM husu konfiansa deputadu sira ba Governu ho objetivu ne’ebé entidade hotu hakarak alkansa liuhosi proposta orsamentu ne’e.
“Membru VIII Governu Konstitusionál hotu disponível partisipa ativamente iha debate parlamentár ne’e tanba sai nu’udar devér atu serbisu loron ba loron, timor-oan sira bele hetan moris di’ak liu,” nia reforsa.
Nia subliña, Governu hakarak país ne’ebé iha oportunidade ba ema hotu, liberdade, no oferese eskolla oinoin ba sidadaun.
Jornalista: Antónia Gusmão
Editora: Julia Chatarina
