Komandante Jerál PNTL, Komisáriu Faustino da Costa no Embaixadór Nova Zelándia ba Timor-Leste, Philip Hewitt, asina akordu kooperasaun hodi entrega karreta foun ho marka, Hi-Lux tolu no Fortuner ida inklui ekipamentu servisu ba PNTL. Imajen/Eugénio Pereira

DILI, 01 outubru 2020 (TATOLI)- Governu Nova Zelándia liuhosi nia embaixada iha Timor-Leste fó apoiu karreta haat no ekipamentu servisu ba Komandu Polísia Nasionál Timor-Leste (PNTL).

Notísia Relevante : Nova Zelándia Apoiu Millaun Ida ba TL Prevene COVID-19

Karreta foun ho marka, Hi-Lux tolu no Fortuner ida inklui ekipamentu servisu no uma edifísiu PAPK nian ba PNTL ne’e, entrega direita hosi Embaixadór Nova Zelándia mai Timor-Leste, Philip Hewitt ba Komandante Jerál PNTL, Komisáriu Faustino da Costa,  liuhosi termu asina karta kooperasaun servisu ne’ebé asiste hosi  Komandante Operasaun Nasionál, Superintendente Xefe Pedro Belo, Komandante Departamentu Polísia Komunitária Nasionál (DPKN), Superintendente Asistente, Helena das Dores iha Kuartél Jerál PNTL, Caicoli, Dili.

Embaixadór Nova Zelándia mai Timor-Leste, Philip Hewitt dehan, apoiu transporte no fasilidade servisu ne’e hodi tulun dezenvolvimentu servisu PNTL nian iha parte DNPKN no Ofisiál Polísia Suku (OPS).

Foto hamutuk. Imajen Tatoli/Eugénio Pereira

“Ha’u hein katak, karreta, uma no ekipamentu sira-ne’e bele ajuda PNTL hodi kontinua nafatin Servius Polísia Komunitáriu iha PNTL hodi bele kontinua hakbesik aan ba komunidade sira,” dehan Embaixadór Philip iha nia diskursu.

Nova Zelándia nu’udar nasaun dahuluk ne’ebé haruka ninia forsa militár no polísia mai hahú misaun dahuluk iha Timor-Leste dezde tinan 1999.

Polísia Nova Zelándia nian envolvimentu ne’ebé naruk iha Timor-Leste hahú kedas iha setembru 2006, hanesan kontributu ba kontinjente 25 hosi Polisia Nasoins Unidas (UNPOL) tama ba misaun ONU iha Timor-Leste (UNMIT).

Polísia Nova Zelándia ho Fundasaun Ázia durante ne’e servisu hamutuk ho membru PNTL hodi dezenvolve no implementa modelu Polisiamentu Komunitáriu ida ne’ebé iha fiar no konfiansa hosi povu.

Iha oportunidade ne’e, embaixadór ne’e mós hato’o ninia preokupasaun kona-ba desizaun Governu Nova Zelándia hodi retira sira nia asesór polísia na’in-tolu ho sira nia família hodi fila ba Nova Zelándia, foin lalais, liuhosi planu programa PAPK ne’ebé sei remata iha novembru 2020.

Nia dehan, asesór sira-ne’e retira sira-nia misaun iha Timor-Leste, tanba problema propagasaun surtu COVID-19.

Maski nune’e, embaixadór ne’e fiar metin katak, Xefe ekipa Polísia Nova Zelándia balun sei kontinua nafatin servisu liuhosi distánsia ho funsionamentu iha Embaixada Nova Zelándia hamutuk ho funsionáriu Timor-oan sira iha Dili hodi kontinua dezenvolve planu tranzisaun atu bele asegura katak, atividade balun bele kontinua iha jestaun Funsaun Ázia nian (TAF).

“Ha’u haree katak, PNTL iha ona kapasidade sufisiente ne’ebé hatudu liuhosi kooperasaun durante tinan-15. Polísia Nova Zelándia, Fundasaun Ázia hamutuk ho PNTL dezenvolve buat lubun ida ona hanesan formasaun ba OPS, formasaun ba formadór sira iha Sentru Formasaun Polísia (CFP), Kurríkulu ba Polísia Komunitáriu, formasaun ba sarjentu sira, harii uma ba OPS, KPK hamutuk 294, kria NOP ba OPS, KPK no KSM,” nia hateten.

Governu Nova Zelándia sei kontinua servisu hamutuk nafatin ho Governu Timor-Leste hodi kapasita no reforsa seguransa iha rai-laran liuhosi servisu ho Fundasaun Ázia hodi asegura moris hakmatek ba sosiedade no nasaun.

Ikus liu, Embaixadór ne’e hato’o mós parabéns ba Governu Timor-Leste, PNTL no povu tomak no ekipa médiku sira-nia kooperasaun servisu di’ak  hodi salva sosiedade no nasaun livre hosi mortalidade surtu COVID-19 ne’ebé ataka mundu tomak.

Iha fatin hanesan, Komandante Departamentu Polísia Komunitária Nasionál (DPKN), Superintendente Asistente, Helena das Dores, lori Komandu PNTL nian naran hato’o agradese ba Governu Nova Zelándia no Fundasaun Ázia ne’ebé apoiu tebes servisu PNTL nian.

“Ami orgullu ho apoiu ne’ebé Embaixada Nova Zelándia fó mai PNTL liuhosi DPKN oinsá mak atu kria servisu ida ne’ebé la’o di’ak liután ho servisu polísia sira iha munisípiu sira hodi estabelese servisu NPKN nian hakbesik ba povu,” nia agradese.

Nia dehan, karreta haat ne’ebé oferta  ba sira sei fahe ba Komandu PNTL Munisípiu sira seluk hodi ajuda implementasaun servisu DNPK nian ne’ebé suporta másimu hosi Governu Nova Zelándia liu hosi apoiu Fundasaun Ázia.

Durante ne’e, DPKN servisu hamutuk ho Diresaun Nasionál Prevensaun Konflitu Komunitária (DNPKK), kontinua buka solusaun ba kazu konfrontasaun ne’ebé akontese iha Timor-Leste.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here