Polisia Tránzitu Dili halo apreensaun ba motorizada lubuk ida tanba komete infrasaun. Imajen Tatoli/Eugénio Pereira

DILI, 01 Outubru 2020 (TATOLI)- Durante fulan sia, hahú hosi janeiru to’o loron 30 setembru 2020, ekipa Polísia Tránzitu Rodoviáriu Munisípiu Dili rejista motorista hamutuk na’in-547 maka komete iha infrasaun.

Notísia Relevante : Polísia halo apreensaun ba motorizada 64 no karreta ida

Motorista hirak-ne’e komete iha infrasaun, tanba utiliza motór no karreta la iha dokumentu, viola regra sinais tránzitu no la iha karta kondusaun (SIM/Surat Ijin Mengemudi).

“Ita haree tuir iha gráfiku ne’e hosi janeiru to’o mai setembru, tinan ne’e, ema ne’ebé envolve infrasaun ne’e hamutuk 547, no metade laiha karta kondusaun,” informa Komandante Polísia Tránzitu Rodoviáriu Munisípiu Dili, Inspetór Domingos Soares Gama, ba jornalista iha nia knaar fatin, Komandu PNTL, Caicoli, Dili.

Ba transporte ne’ebé laiha karta kondusaun no dokumentu, tuir lei PNTL halo apreensaun depois haruka infratór sira tenke ba selu multa iha banku no lori fali resibu ba foti transporte iha PNTL hodi ba trata dokumentu kompletu iha Diresaun Nasionál Transporte no Terrestre (DNTT).

Ba motorista sira ne’ebé la iha karta kondusaun obrigatóriu tenke ba trata karta kondusaun iha DNTT, Hera-Dili.

Inspetór Domingos Gama hatutan, sira-nia parte mós simu ona karta hosi Primeiru-Ministru nu’udar mós Ministru Interiór hodi fó orientasaun ba Komandante Polísia Departamentu Nasionál Tránzitu no Seguransa Rodoviáriu, Superintendente, João dos Reis Belo, ho halo sosializasaun maka’as lei tránzitu nian ba sosiedade atu bele kumpre lei sira bainhira uza transporte tenke kuidadu aan hodi evita asidente tráfegu.

Apreensaun ba motór 48

Komandante PNTL Munisípiu Dili, Superintendente Xefe Henrique da Costa, informa iha loron tersa kalan (29/09), Seksaun Tránzitu Dili halo operasaun konsege halo apreensaun ba motorizada hamutuk 48 mak laiha dokumentu.

“Ita nia polísia tránzitu prende tan motorizada 48, tanba  laiha dokumentu no asesoria motorizada nian,” nia hateten.

Nia dehan, tama ba  outubru to’o dezembru, tinan ne’e, PNTL sei servisu maka’as hodi halo operasaun iha fatin hotu-hotu hodi fahe informasaun ba sosiedade atu lori kualkér transporte tenke lori dokumentu kompletu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here