Ministru Asuntu Parlamentár no Komunikasaun Sosiál, Francisco Jerónimo, dada-lia ho Prezidente RTTL, Francisco da Silva ‘Gari’ inklui dirijente sira, iha edifísiu Caicoli, kinta (01/10). Imajen Tatoli/Natalino Costa

DILI, 01 outubru 2020 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, hala’o inspesaun urjente ba Rádiu Televizaun Timor-Leste, Empreza Públika (RTTL,E.P) hodi haree direita situasaun serbisu iha mídia estatál ne’e rasik.

Iha inspesaun, membru ezekutivu ne’e identifika no nota buat balun ne’ebé konsidera presiza hadi’a hanesan jestaun internál.

“Ha’u nota buat lubuk ida no orienta ona sira atu halo serbisu ne’e. Ha’u hein rezultadu iha tempu badak no husu atu hadi’a jestaun uma-laran sai konduzivu, sai uma laran ne’ebé maka ema hotu hakarak mai serbisu, hadi’a di’ak ba nasaun no ba bem estar povu tomak ninian,” tenik Ministru  Francisco, hafoin ramata halo inspesaun iha edifísiu RTTL, Caicoli, kinta ne’e.

Governante ne’e fó hanoin atu disiplina tanba mídia estatál ne’e iha papél importante ba divulgasaun informasaun liuhosi kanál rádiu, televizaun no online.

“Ha’u orienta dirijente sira atu hahú ko’alia ba malu implementa regra didi’ak iha fatin serbisu,” nia akresenta.

Objetivu mai vizita tanba MAPKOMS tutela ba área komunikasaun sosiál, liuliu ba RTTL no Agência Noticiosa de Timor-Leste, Instututu Públiku (Tatoli,I.P), tanba ne’e iha obrigasaun no devér tau-matan.

“Atu haree prosesu no progresu ne’ebé la’o, buat ne’ebé seidauk di’ak presiza hadi’a no buat balun ne’ebé di’ak ona kontinua motiva malu hodi bele la’o di’ak liután,” nia fó hanoin.

Biban ne’e, Ministru motiva no enkoraja Prezidente RTTL ho jerente tomak atu hala’o serbisu ho di’ak.

“Motiva nafatin RTTL, tanba ne’e obrigasaun atu mai motiva Prezidente ho Diretór sira hotu, labele fuan kiik maibé tenke fuan bo’ot halo serbisu, ida-ne’e maka ha’u hakarak”, nia subliña.

Iha fatin hanesan, Prezidente RTTL, Francisco da Silva ‘Gari’, nota katak presenza MAPKOMS ne’e atu haree progresu serbisu no atividade loron-loron no husu funsionáriu sira atu disipliña iha dezempeña serbisu hodi kontribui ba nasaun no povu.

“Ami ohin hateten katak ami presiza tempu atu halo mudansa, maibé ami nafatin halo koordenasaun di’ak ho ekipa sira, liuliu sira ne’ebé iha terrenu, nune’e ekipa hotu bele sai forte no fó informasaun di’ak ba sidadaun liuhosi kanál RTTL rasik,” dehan Prezidente mídia estatál ne’e.

Iha vizita ne’e, Prezidente RTTL ne’ebé akompaña ho dirijente sira informa mós kona-ba progresu dijitalizaun ne’ebé daudaun la’o hela.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here