Imajen/Espesiál.

DILI, 01 outubru 2020 (TATOLI)—Ministériu ba Asuntu Kombatente Libertasaun Nasionál (MACLN-sigla portugés) lideradu Júlio Sarmento “Meta Malik” fó prioridade pagamentu pensaun ba veteranu sira no apoia kombatente halo tratamentu iha estranjeiru durante tinan fiskál 2020.

Notísia Relevante: MSSI prioritiza medida prinsipál sia iha 2020

“Promove no asegura kontinuidade inisiativa rekoñesimentu no glorifikasaun libertasaun nasionál no erói sira. Fó kontinuidade pagamentu pensaun ba veteranu sira, bolsa estudu no apoia médiku iha estranjeiru ba kombatente sira,” haktuir medida setoriál prinsipál iha tinan 2020 hosi MACLN, ne’ebé sita iha Planu Asaun Anuál (livru 2) ne’ebé Agência TATOLI, asesu kinta ne’e.

Medida prinsipál seluk hosi ministériu refere mak orefese kaixaun/urna funerária ba serimónia fúnebre restus mortais mártir sira no organiza enterros (penguburan) iha Jardín erói Metinaro.

Nune’e mós organiza serimónia komemorativa de efemérides liga ba kombatente libertasaun nasionál no istória foun nasaun nian.

Ministériu ba Asuntu Kombatente Libertasaun Nasionál  ne’ebé lidera hosi Júlio Sarmento “Meta Malik” ne’e sei garante funsionamentu Konsellu Kombatente Libertasaun Nasionál (CCLN-sigla portugés), dezenvolve konstrusaun jardín erói no semitériu espesiál ba kombatente libertasaun nasionál sira.

Medida prinsipál hosi ministériu refere kontinua dezenvolve boa governasaun, jestaun institusionál servisu tomak ministériu nian, fortalese instituisaun no eleva kapasidade rekursu umanu.

Orsamentu hosi Ministériu ba Asuntu Kombatente Libertasaun Nasionál hamutuk $98,768,183 ba tinan fiskál 2020, inklui montante orsamentu $ 93,298,510 ne’ebé destinada ba pagamentu pensaun sira ba kombatente libertasaun nasionál liuhosi rúbrika ransferénsia públika.

Hosi montante $98,768,183 ne’e fahe ba saláriu no vensimentu $555,564, bens (sasán) no servisu $3,829,658, kapitál minór $434,451, kapitál dezenvolvimentu $650,000 no kapitál dezenvolvimentu $93,298,510.

Hosi montante orsamentu $98,768,183 ne’e ezekuta ona balun hahú hosi janeiru to’o setembru. Entretantu resta orsamentu sei hahú ezekuta hahú hosi outubru, novembru no dezembru tinan 2020.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here