Prezidente Komisan C, Deputada Maria Angelica Rangel. Imajen/Antonio Goncalves

DILI, 01 outubru 2020 (TATOLI)—Komisaun C (Finansa Públika) liderada Deputada Maria Angélica Rangel, finaliza ona relatóriu no pareser proposta Orsamentu Jerál Estadu (OJE) 2020 no orsida tuku 14.00 sei aprezenta ba plenária hodi halo debate iha faze jeneralidade.

Komsaun Finansa Públika prova relatóriu no pareser ne’e ho rezultadu votasaun a-favór 10, kontra 0 no abstensaun 3.

Prezidente Komusaun C, Maria Angélica Rangel, fó-sai katak loloos ne’e ohin tuku 11.00 dadeersan debate ona maibé tanba Komisaun C seidauk finaliza relatóriu no paresér entaun adia ba tuku 14.00 lokraik.

“Ami foin halo aprovasaun relatóriu no paresér iha komisaun C nian, inklui mós komisaun espesializada hotu-hotu. Ami konklui ona no sei lori ba plenária iha tuku 14.00 lorokrak,” Deputada Maria Angélica Rangel, informa ba jornalista sira iha resintu Parlamentu Nasionál, kinta ne’e.

Prezidente Komisaun C ne’e hateten, rekomendasaun ne’ebé komisaun sei levanta iha plenária mak estrutura orsamentu ne’ebé la koloka iha fatin loloos.

Prezidente Komisaun C ne’e fó ezemplu, orsamentu ba rekuperasaun ekónomika ne’e loloos ne’e deskreve iha fundu COVID-19 la’ós tau fali iha Ministériu Estadu Koordenadór Asuntu Ekonomia (MEKAE).

“Dívia ser tau iha fundu COVID-19 nian la’ós tau iha Ministériu Estadu Koordenadór Asuntu Ekonomia (MEKAE),” nia dehan.

Lider Komisaun C ne’e mós rekomenda ba Governu solusiona dívida naun-finanseira ne’ebé Governu anteriór sira halo.

Nia mós nota dokumentasaun orsamentál 2020 nian iha errata maibé sei fó-sai liuhosi relatóriu no paresér liuhosi plenária.

“Loos! Livru orsamentu ne’e errata barak depois ita-boot sira sei akompaña iha ami-nia relatóriu,” Prezidente Komisaun C ne’e hateten.

Iha tuku 14.00 lorokraik ba loron ohin nian, Governu sei hatán despeza ho montante orsamentu biliaun $1.497,1 prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Montante orsamentu biliaun $1.497,1 ne’e, Governu ezekuta ona balun hahú hosi janeiru to’o setembru 2020 liuhosi Dotasaun Temporáriu Orsamentál (DOT).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here