Diretór DIDI-IDN, Nuno Corvelo Sarmento, konversa ho veterana Rafuletok, durante hala’o entrevista hodi rekolla memória FALINTIL iha Munisípiu Covalima. Imajen/IDN-TL

DILI, 01 outubru 2020 (TATOLI)- Institutu Defeza Nasionál Timor-Leste (IDN-TL)  hahú hala’o ninia knaar importante ida hodi rekolla memória ba istória furak hosi pasadu luta FALINTIL nian  hotu iha territóriu Timor-Leste hodi prezerva ba istória iha futuru Timor-Leste.

Notísia Relevante : DN-TL halo marxa saudavel husi Becusi ba Laulara

IDN-TL rekolla memória hirak ne’e nu’udar misaun atu kontribui ba dezenvolvimentu hanoin no planeamentu Estratéjiku Nasional no internasionál liuhosi promosaun ensinu, investigasaun no debate kona-ba área Defeza no Seguransa Nasionál.

Atu konkretiza misaun ne’e, IDN-TL liuhosi Departamentu Investigasaun Dezenvolvimentu Inovasaun (DIDI), ne’ebé harii iha tinan 2019 liubá atu bele kompleta misaun, no objetivu ne’ebé IDN iha, hanesan instituisaun Estadu iha Timor – Leste.

Diretór DIDI-IDN, Nuno Corvelo Sarmento, konversa ho veteranu Jacinto Moniz, durante hala’o entrevista hodi rekolla memória FALINTIL iha Munisípiu Covalima. Imajen/IDN-TL

Tuir  nota  komunikadu hosi IDN-TL ne’ebé  Agência Tatoli asesu, ohin, informa katak, progresu servisu DIDI hala’o dezde nia eziste, kontinua formasaun sira ne’ebé IDN programa, hanesan kursu Seguransa no Defeza Nasionál ba xefe suku 452 ne’ebé konklui ona módulu ba dahuluk (parte teórika) iha fulan jullu, tinan ne’e, no tuir mai xefe suku sira sei remata ho formasaun ba segundu faze ho módulu ida avansadu/elementár ho baze ba simulasaun ho kazu konkretu.

Hanesan ezemplu ba kazu konkretu foin lalais ne’e propagasaun surtu COVID-19 ne’ebé afeta ba mundu tomak no Timor-Leste la sees aan hosi kontájiu ba moras ida ne’e. Ho ida ne’e,  IDN aproveita situasaun ne’e  hodi envolve xefe suku sira tau em-pratika sira nia koñesimentu ne’ebé arkiri durante iha formasaun ida ne’e liuhosi atividade de partilla  informasaun no sensibilizasaun hodi apoia iha kombate no prevensaun ba epidemia ida ne’e.

Tuir mai sei kompleta tan ho matéria balun hodi finaliza sira-nia formasaun iha novembru ho dezembru, tinan ida ne’e.

Diresaun DIDI kontinua  ho programa rekolla dadus hosi testemuña no autór envolve nu’udar membru FALINTIL no kuadru polítiku envolve  iha prosesu funu ba Libertasaun Nasional hahú husi 1975.

 “Ami identifika poténsia elementu atu entrevista, tuir setór no hahú hosi setór Norte mós haree ba fatór idade no saúde, ami halo mós entrevista pontuais ba elementu ne’ebé disponivel. Iha faze inisiál ne’e, intermus númeru entrvistadus,  to’o oras ne’e ema besik-50,” informa Diretór DIDI, Nuno Corvelo Sarmento.

Nuno Corvelo Sarmento hatutan , tuir loloos númeru sasin entrevistadu kontinua aumenta barak ona,  maibé tanba situasaun atuál Timor-Leste enfrenta hela problema barak hodi afeta servisu balun, maibé ekipa IDN-TL kontinua  hatudu ninia vontade hodi la’o neineik  rekolla dadus hotu.

DIDI hamutuk ho diresaun mídia prepara hela filmajen ne’ebé sei lansa iha televiziva kona-ba rezultadu hosi entrevista ne’ebé ekipa téknika prepara ona ba memória FALINTIL.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here