Fundasaun ASSA, iha kinta ne’e fahe ona sertifikadu ba formandu lian inglés hamutuk ema na’in 30.Imajen/Felicidade Ximenes.

DILI, 01 outobru 2020 (TATOLI)-Fundasaun ASSA, iha kinta ne’e fahe ona sertifikadu ba formandu lian inglés hamutuk ema na’in 30 husi Departementu Saúde UNTL, UNITAL, UNDIL, CRISTAL, ICS no médiku sira husi Ospitál Nasionál Guido Valadares (HNGV-sigla portugés) Dili.

”Etapa dahuluk ne’ebé mak profisionál médiku sira tuir (formasaun-red) ne’e hamutuk 60 maibé 30 mak simu sertifikadu no 30 seluk sei halo estájiu iha munsípiu  entaun  médiku husi HNGV ne’ebé tuir formasaun lian inglés  ne’e  husi departamentu mentál nian  hamutuk na’in tolu,’’ informa Diretór Ezekutivu Fundasaun ASSA, Bendito Soares, ba Agência TATOLI iha HNGV.

Formasaun ne’e hala’o ona durante fulan tolu hahú fulan-jullu to’o setembru ne’e ho objetivu atu hasa’e abilidade ba profesionál médiku sira iha área lian inglés ninian.

”Iha etapa dahuluk ba formasaun ne’e  ami halo kooperasaun servisu ho Ospitál Nasionál Guido Valadares, entaun ami seidauk iha suporta maibé ami tenta nafatin oinsá mak suporta husi parte Governu nian liliu iha fundu kapitál dezenvolvimentu umanu nian,’’katak nia.

Entretantu, Fundasaun ASSA estabelese iha loron 12 fulan-dezembru 2019 iha Dili, organizasaun naun govermentál (ONG) ne’e hala’o ho ninia misaun iha área edukasaun no desportu.

“Objetivu husi Fundasaun ASSA mak eleva kapasidade labarik foinsa’e sira iha área edukasaun no desportu atu dezenvolve talentu foinsa’e iha desportu profisionál liuhusi Clubu ASSA, dezenvolve moris di’ak iha sosiu ekonómiku no páz desportu,” nia dehan.

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here