Imajen TATOLI/Osória Marques

DILI, 30 setembru 2020 (TATOLI)—Centro Nacional Chega (CNC) koopera ho Associação Deficientes de Timor-Leste (ADTL), ohin, organiza kolókiu atu introdús CNC nia knaar no mandate sira, inklui fahe infromasaun kona-ba relatóriu CAVR “Chega!” no CVA “Per Memoriam Ad Spem” ba maluk ema ho defisiénsia sira.

Diretór Ezekutivu Centro Nacional Chega (CNC), Hugo Maria Fernandes, hateten relatóriu CAVR “Chega!” nia laran ne’e iha rekomendasaun sira ne’ebé mak iha relasaun diretamente iha sosiedade Timor, ne’ebé mak tama ba ema ho defisiénsia sira ne’e hanesan obrigasaun Estadu tenke halo polítika no programa ne’ebé mak responde ba nesesidade ba ema ho defisiénsia sira no ba dezenvolvimentu ba ema hotu-hotu nian, partikularmente ba sosiedade sira ne’ebé maka tama ba iha kategori nesesidade espesial nian.

“Comissão de Acholimento, Verdade e Recocoliação (CAVR) mak hakerek relatóriu “Chega!” ne’e hamutuk 3600 pajina. Importante, liuhosi relatóriu ne’e nia laran iha rekomendasaun sira-ne’ebé mak iha relasaun diretamente iha sosiedade Timor, ne’ebé mak tama ba ema ho defisiénsia sira-ne’e hanesan obrigasaun Estadu tenke halo polítika no programa  ne’ebé mak responde ba nesesidade ba ema ho defisiénsia sira no dezenvolvimentu ba ema hotu-hotu nian, partikularmente  ba sosiedade sira ne’ebé tama iha kategori nesesidade espesiál nian,” dehan Hugo Maria Fernandes iha ninia aprezentasaun materia kona-ba Papel CNC no relatóriu CAVR no CVA iha salaun konferénsia Antigu Komarka, Balide, Dili, kuarta ne’e.

Hugo Fernandes hateten, CNC sei servisu hamutuk ho Associação Deficientes de Timor-Leste (ADTL) hodi implementa programa balu lihosi programa “Hakbi’it Sobrevivente” ne’ebé mak hare’e liu ba ema  ho defisiénsia sira, ema vulneravel sira, ba vítima sira ne’ebé  mak mukit liu tanba hetan sofre funu iha tempu naruk nia laran.

Entertantu, Diretór Associação Deficientes de Timor-Leste (ADTL), Cesario da Silva, hateten ADTL observa CNC nia vizaun ida mak atu haree kona-ba sosiedade ne’ebé inkluzivu no atu promove direitu umanu. Iha situasaun ida-ne’e, nia dehan, ADTL atu koloka direitu umanu ba asuntu ema ho defisiénsia sira ne’ebé ADTL akompaña iha Timor-Leste.

“Asuntu defisente ne’e ema hare’e liu ba pensamentu karidade no pensamentu ida-ne’e mak ita hakarak sobu. Ne’ebé, laloos sira hanoin ema ho defisiensia sira ne’e labele halo buat ida no labele hola parte iha situasaun no fatin sira hanesan ne’e,” nia dehan.

Imajen TATOLI/Osória Marques.

Tanba ne’e, nia rekomenda hela ba Centro Nacional Chega (CNC) ba asuntu ema ho defisiénsia sira lubuk ida maka hetan sofrementu no torturasaun hosi funu pasadu. Nia husu ba CNC atendimentu ba saude mentál nune’e bele halo akonsolamentu ba saúde mental, hodi responde ba hirak nebe’e maka sai vítima ba luta hodi hetan ukun rasik aan ida-ne’e no agora mós sira sei sai vítima ba nafatin.

Ba future, nia hateten, Associação Deficientes de Timor-Leste (ADTL) ho Centro Nacional Chega (CNC) sei servisu hamutuk liuliu atu desimina informasaun ba ema ho defosiénsia sira, nune’e mós atu halo advokasia hamutuk ho rekomendasaun sira ne’ebé “Chega!” iha hodi hato’o ba ministeriu relevante sira atu bele inplementa iha asaun planu ministeriu nian.  

“Iha mudansa maibé CNC seidauk iha kondisaun no iha ne’e mós rekoñese liuliu asesibilidade seidauk bele responde. Maibé, ho inisiativa ida-ne’e bele halo ami mós hola parte iha fatin ida ne’e no kontinua nafatin programa sira hanesan ne’e, atu nune’e ema ho defisiénsia sira ne’ebé seidauk partisipa karik, iha tempu tuir mai sira mós bele partisipa,” nia dehan.

Atu nune’e, nia hateten, ema ho defisiénsia sira bele rona no hatene kona-ba Tior-Leste nia istória rasik hodi kuda nasionalizmu no patriotizmu, tanba agora daudaun ema ho defisiénsia sira hamutuk 38 mil no sira hetan defisente ne’e kauza hosi funu tanba sira mós kontribui Tior-Leste nia ukun rasik aan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here