Diretóra Executivo Fundasaun Alola, Maria Imaculada Guterres. Imajen Tatoli/ Egas Cristovão

DILI, 01 outobru 2020 (TATOLI)-Fundasaun Alola liuhosi programa Ha’u Hili Atu Kura (HALIKU), hamutuk ho Konsellu Nasionál Kankru Susun Timor-Leste, no mós Xanana Reading Room, kinta ne’e hala’o semináriu ida kona-ba moras kankru ho tema “deteksaun sedu sei salva ita-nia vida”.

Semináriu ne’e parte ida hodi komemora loron mundiál “Outobru Rosa” ne’ebé tinan-tinan Fundasaun Alola fó importansia atu konsensializa públiku liliu feto sira atu halo deteksaun sedu hodi prevene no kura moras kankru iha Timor-Leste.

Nótisia Relevante :2015-2020, feto na’in 400 sofre kankru susun

“Ha’u husu atu ema hotu bele tau importánsia ba detesaun sedu ba moras kankru tanba kankru bele kura bainhira detekta sedu tanba ho deteksaun sedu la’ós de’it fundamentál maibé hanesan xave ida atu bele salva ita-nia vida husi moras kankru,” dehan Diretora Fundasaun Alola, Maria Imaculada Guterres, bainhira sai oradór ba semináriu ne’ebé hala’o iha Xanana Reading Room, Dili, kinta ne’e.

Nia dehan dalabarak akontese iha sosiedade Timor-Leste tauk atu konsulta ho médiku sira kona-ba moras kankru, tanba ne’e ho semináriu ne’e bele konsensializa feto sira oinsá atu tratamentu sedu hodi salva sira-nia vida.

 “Atu tulun komunidade sira ka inan feton sira bele redúz no bele halo prevensaun ba kankru susun nian, maka ami halo atividade sira liliu hasa’e konsensia kona-ba moras kankru ne’e rasik, husi fatór no risku ne’ebé kontribui hodi hamosu moras, no sinál kankru nian no tratamentu saida bele halo tanba ne’e maka ami servisu hamutuk ho Komite Nasionál Kankru Susun Timor -Leste nian, hodi fahe informasaun ba ita-nia joven sira,” nia hateten.

Feto ho idade produtivu husi  14 to’o 40 maka rejista a’as liu hetan kankru susun. “Kazu kankru susun ne’e rasik to’o agora seidauk hatene nia kauza loloos, husi saida, durante ne’e pasiente sira rejistu iha HNGV, iha ne’ebá,  80 % mak hetan kazu avansadu tanba pasiente sira mai ho kondisaun grave ona,” nia esplika.

Iha fatin hanesan Vise Prezidente  Konsellu Nasionál Kankru Susun Timor-Leste, Raimundo Santos,  hateten pasiente kankru susun barak mak mate tanba mai halo tratamentu iha HNGV ho Estádium ikus no labele kura ona

“Durante ne’e barak mós lakon nia vida tanba ita-nia inan feto balun ladun iha koñesimentu entaun koko atu tratamentu tradiosionál iha munisípiu sira, bainhira dada-iis ladi’ak ona ne’e hatudu katak iha estadiun haat ka to’o ona pulmaun maka sira aprezenta entaun, ne’e susar ona atu salva sira-nia vida,” nia hatutan.

Entretantu, antes ne’e tuir dadus ne’ebé fó sai husi HNGV komesa husi tinan 2015-2020, rejista feto hamutuk 400 maka sofre moras kankru susun.

Xefe Departementu Sirúrjia HNGV, Alito Soares, hateten husi númeru ne’e pursentu 50 mai halo tratamentu ho kondisaun grave  tanba kategoria estadium tolu no haat hodi da’et ona ba orgaun seluk hanesan pulmaun, aten, ruin no kakutak.

Husi númeru ne’e pursentu 80 (%) la konsege rekupera ka mate tanba mai halo tratamentu ho kondisaun grave ona.

Kankru susun ne’e fatór ida maihosi jenétika familia liliu inan ida kona moras refere fasil atu da’et mós ba oan feto, fatór seluk maka hahán kímiku sira risku mós ba feto sira atu hetan moras kankru susun.

”Hahán ne’ebé mak daudaun ita-nia komunidade konsumu ne’e la saudavel iha kímiku ne’ebé mak barak entaun kankru ne’e kauza husi hahán mos bele kontiudu hormon, kontiudu kímiku ne’ebé selula iha ita-nia isin no selulár ne’e forma sai filafali kankru,” katak nia.

Nótisia Relevante :2014-2019, Pasiente Sofre Kankru Serviks Hamutuk Ema Na’in 130

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here