Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál, kinta (01/10). Imajen Tatoli/Egas Cristovão

DILI, 01 outubru 2020 (TATOLI)–VIII Governu Konstitusionál hahú aprezenta proposta Orsamentu Jerál Estadu (OJE) 2020 ba datoluk iha faze jeneralidade ho karatér urjénsia, ne’ebé antes ne’e ezekutivu sira fixa ho montante biliaun $1,497.

Montante ne’e fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4.

Iha biban ne’e, Primeiru-Ministru (PM), Taur Matan Ruak, husu membru Parlamentu Nasionál (PN) atu konsidera proposta ne’e .

“Ba datoluk Governu aprezenta no husu aprovasaun ba Proposta Orsamentu Jerál Estadu ba tinan fiskál 2020. Aprezentasaun ne’e iha sirkunstánsia ne’ebé exesionál tebes, bainhira pasa fulan-sanulu ho ezekusaun orsamentál iha rejime duodésimu durante períodu ne’ebé ita hasoru teste ida, nu’udar povu no nasaun soberana ne’ebé unida no independente,” intervensaun Xefe Governu iha loron dahuluk debate faze jeneralidade iha sala plenáriu plenariu, kinta ne’e.

Xefe ezekutivu konsidera timor-oan sira hatudu ona kapasidade ba mundu atu reziste hasoru krize no adversidade, hodi reaje ba dezafíu no obstákulu inklui ba difikuldade no mudansa sira ho aten barani, firmeza, konjugasaun entendimentu no mobilizasaun husi vontade no esforsu.

“Hafoin rejeisaun proposta orsamentu daruak, mosu kedas períodu inserteza no impase polítiku iha nível nasionál. Nu’udar nasaun sente orgullu tanba ita-nia diferensa polítika oinoin bele rezolve ho dame maibé naturalmente hosi natureza polítika ne’e rasik mak ita iha hanoin la hanesan. Mosu diskusaun ho respeitu no partilla mehi ne’ebé boot tebes atu transforma Timor-Leste sai país justu, modernu, ekuitativu, prósperu no dezenvolvidu liután ho rendimentu médiu-as,” nia akresenta.

Nia nota katak durante ne’e Timor-Leste hatudu hanesan país ne’ebé haree liubá sidadaun ne’ebé hatuur ema-nia dignidade iha sentru dezenvolvimentu, fó kondisaun moris di’ak sosiál no ekonómiku, asesu ba saúde, edukasaun, abitasaun, eletrisidade, bee no saneamentu báziku, ne’ebé nesesáriu.

“Kondisaun no biban hirak ne’ebé ita hotu rekoñese hanesan buat ne’ebé nesesáriu no esensiál atu kumpre promesa oin-oin ne’ebé Governu repete ona durante tinan sanulu-resin-ualu nia laran atu halakon hamlaha, hamenus moris-kiak, kria empregu dignu no husik hela hanesan liman-rohan ba jerasaun foun sira, país prósperu, pasífiku, tolerante, inkluzivu, sensível ba kestaun jéneru no maske preokupa ho ninia sidadaun sira-nia moris haksolok, la haluha no la husik hela ita-nia maluk ida ba kotuk,” nia subliña.

Iha loron 15 outubru 2019, Governu submete Proposta Lei OJE 2020 daruak ba PN, ne’ebé ho montante biliaun $1,950 (inklui impréstimu $73), bainhira esklui impréstimu hamutuk biliaun $1,887, no bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Maski nune’e, iha loron 3 dezembru 2019, Primeiru-Ministru, Taur Matan Ruak, retira Proposta OJE 2020 husi PN tanba rona opiniaun no preokupasaun husi deputadu sira ne’ebé konsidera montante boot liu no kontra Lei Jestaun Finanseira.

Nune’e, Governu lori hikas proposta ba daruak hodi diskute maibé iha 17 janeiru 2020, Proposta OJE 2020 la pasa iha diskusaun jeneralidade ho rezultadu votasaun a-favór 13, kontra 15 no abstensaun 25.

Proposta foun OJE 2020 ne’ebé la pasa ho montante biliaun $1,668, kompostu hosi sálariu no vensimentu millaun $235,6, bens no servisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,83.

Tuir ajenda ne’ebé aprova ona iha reuniaun líder bankada, diskusaun jeneralidade no espesialidade ho karatér urjénsia ne’e sei realiza durante loron hitu, hahú ohin.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here