Tribunal Distritál Dili.

DILI, 30 setembru 2020 (TATOLI)-Liuhosi leitura desizaun koletivu juis, ohin, iha Tribunál Distritál Dili (TDD) ba kazu korrupsaun ativa no kondusaun sem karta ne’ebé envolve hosi arguidu MS, parte Tribunál husu mós ba   Ministériu Públiku (MP) atu inisia investigasaun ba membru  polísia hosi Unidade Tránzitu tanba deskonfia husu osan ba motorista.

Notísia Relevante : Polísia Tránzitu Detein BFS Tanba Tenta Fó Subornu $20

Iha leitura desizaun, Juiza Maria Solana hateten, durante produsaun prova iha audiénsia julgamentu liuhosi deklarasaun arguidu, sasin no auto ne’ebé konsta iha faktu balun provadu no balun la provadu.

Nia esplika, faktu provadu maka iha loron 27  abríl  2019 iha  tuku 22:05 Otl, iha area Hudi Laran, Suku Bairru-Pité, Dili, membru  Polisia Tránzitu Munisípiu Dili hala‘o hela auto stop hodi pasa revista dokumentu ba karreta no motor ba sirkulasaun iha area refere, no momentu ne’ebá arguidu  MS  maka kondús karreta kamioneta ida ho matrikula 59-247 TL hosi diresaun Bairru-Pité  kuandu arguidu iha fatin auto-stop, membru polísia hodi husu dokumentu karreta nian no mós husu karta kondusaun, hafoin entrega dokumentu karta nian ba polísia tránzitu halo konfirmasaun ba dokumentu sira ne‘e.

Liuhosi konfirmasaun ne’e nota katak dokumentu KIR karreta refere liu ona prazu. Aliende ne‘e, membru polísia tránzitu husu mós ba arguidu  ninia karta kondusaun, maibé arguidu hatán katak ninia karta kondusaun  hela iha uma.

Juiza Maria Solana esplika, faktu la provadu maka hafoin halo auto-stop pasa revista ba  dokumentu sira arguidu nian haree ba arguidu nia karta kondusaun laiha, nune’e sasin hosi membru Polísia Unidade Tránzitu ho inisiál LP mak husu uluk osan ho montante $50,00 ba arguidu, nune’e  arguidu hatama liman ba bolsu laran dada sai osan iha de’it $20,00  hodi fó maibé membru polísia ne’e rejeita hodi informa nia komandante iha terrenu hodi halo detensaun kedas.

Juiza Maria Solana esplika tan, motivasaun faktu iha audiénsia julgamentu arguidu konfesa parsialmente la nega faktu sira katak, momentu ne’ebá arguidu  la’ós ho intensaun atu fó osan maibé membru polísia mak husu uluk. Tanba ne’e halo Tribunál  dúvida, nune’e haree   krime korrupsaun ativa ne’ebé previstu iha artigu 294  númeru 2 iha kódigu penal Timor-Leste, ne’ebé antes ne’e MP imputa ba arguidu  la prienxe elementu no sujetivu tanba entrega osan la ho intensaun no membru polísia mak husu uluk osan, ho nune’e, absolve arguidu hosi krime ne’e.

Tribunál mós  absolve krime kondusaun sem karta, tanba iha karta ofisial hosi Diresaun Nasional Transporte Terrestre (DNTT) katak arguidu iha karta kondusaun.

Ikus liu Juiza Maria Solana husu  membru polísia refere atu devolve fali osan arguidu nian $20.00 no husu mós ba  Ministériu Públiku atu halo  extraisaun ka re-inísiu investigasaun hasoru sasin ho inisiál LP nu’udar membru polísia hosi Unidade Tránzitu tanba husu no simu osan hosi arguidu.

Prosesu julgamentu ne’e Ministériu Públiku reprezenta hosi Prokuradór Rogério Viegas no arguidu hetan asisténsia legal hosi Defensor Públiku.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here