Sekretáriu Estadu Kooperativa, Elizário Ferreira. Imajen Tatoli/Egas Cristovão

DILI, 30 setembru 2020 (TATOLI)-Sekretaria Estadu Kooperativa (SEKoop) realiza semináriu online (webinar) ho autoridade Timór Osidentál, Kupaun, atu halo promosaun ba tais Timor iha nível internasionál.

Sekretáriu Estadu Kooperativa, Elizário Ferreira, konsidera tais hanesan uzu kulturál ne’ebé bele mós uza ba serbisu fatin.

“Webinar ne’e atu promove tais hanesan uniforme ba funsionáriu públiku sira sai hanesan produtu ida ba ema hotu iha nível nasionál no internasional,” tenik Sekretáriu Estadu Elizário Fereira ba Agência Tatoli, iha edifísiu Akait, kuarta ne’e.

Semináriu online ne’e ba dala-neen, ne’ebé antes ne’e la’o desde abríl 2020.

“Ein prinsípiu, SEKoop promove ona fronteira sai hanesan fatin ida ba merkadu no fatin atu promove produtu ho dame no promove sai hanesan sentru movimentasaun turista ba rai rua ne’e,” nia akresenta.

Notísia Relevante: Programa MTKI: tais lokál prodús uniforme ba funsionáriu públiku

Membru ezekutivu haktuir, liuhosi diskusaun ne’e autoridade Indonézia liuliu Kupaun hakarak ajuda promove Timor-Leste nia produtu hanesan tais.

“Normalmente kualidade ita-nia tais tradisionál tebes, tanba ne’e ita presiza ho apoiu sira atu nune’e bele forma ita-nia produtór soru-tais sira ne’ebé prodús ho kualidade,” nia subliña.

Biban ne’e, governante ne’e louva Autoridade Rejiaun Administrativu Espesiál Oé-cusse Ambeno (RAEOA) tanba hahú promove tais iha instituisaun Estadu nian.

“Ita haree RAEOA ninian desizaun katak segunda no tersa  sira uza tais hanesan ropa ofisiál ida,” nia nota.

Entretantu, webinar ne’e partisipa hosi Vise-Ministra Turizmu Komunitária Inâcia da Conceição Texeira, Prezidente Autoridade RAEOA Filomeno Paixão Bano inklui Embaixadór Indonézia iha Timor-Leste Sahat Sitorus.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here