Lansamentu primeira pedra ba uma komunikasaun ne’e partisipa hosi Sekretáriu Estadu Komunikasaun Sosiál (SEKOMS) Mericio Juvinal "Akara", Prezidente Konsellu Imprensa (CI) Virgílio da Silva Guterres no deputadu sira. Imajen TATOLI/Evaristo Soares Martins.

DILI, 30 setembru 2020 (TATOLI)—Programa Nasaun Unida ba Dezenvolvimentu (PNUD/UNDP) no Uniaun Europeia (UE) apoia konstrui “Uma Komunikasaun” ba Parlamentu Nasionál.

Prezidente Parlamentu Nasionál, Deputadu Aniceto Longuinhos  Guterres Lopes, hateten Parlamentu Nasionál tuur iha fatin ida-ne’ebé labele troka iha Timor-Leste nia sistema demokrátiku ne’ebé reprezenta soberania no vontade povu nian.

“Uma Komunikasaun ne’e dedika ba jornalista sira atu-bele iha kondisaun ne’ebé di’ak liu hodi dezenvolve sira-nia serbisu no mós garante informasaun ne’ebé kualidade ba sidadaun sira,” Aniceto Guterres hateten iha Parlamnentu Nasionál, kuarta ne’e.

Nia dehan, Parlamentu Nasionál mak sei halibur debate polítiku, debate públiku no iha forsa hosi konverjénsia sei nakfila iha aprovasaun polítika públika sira ne’ebé sei lori dezenvolvimentu sustentável nasaun nian, hakbesik mós instituisaun refere ba aspirasaun sidadaun sira.

Parlamentu Nasionál, nia dehan, tenke kumpre didi’ak dever konstitusionál sira maibé mós hatene hakat liu métodu tradisionál sira.

Iha fatin hanesan, Embaixadór Uniaun Europeia iha Timor-Leste, Andrew Jacobs, hateten programa ne’e atu finánsia instalasaun ba sala imprensa no sala konferénsia imprensa iha Parlamentu Nasionál.

Imajen TATOLI/Evaristo Soares Martins.

“Ami-nia ideia mak atu harii “Uma Komunikasaun” ida iha parlamentu, nia instalasaun sira mak sala dedikadu ida ba jornalista akreditadu sira ho internet fasilita ba imprime no movel sira, iluminasaun no ligasaun tékniku ba televizaun no rádiu no mós fasilidade ba rádiu iha parlamentu,” Andrew Jacobs hateten.

Entretantu Reprezentante PNUD, Munkhtuya Altangerel, hateten “Uma Komunikasaun” ne’e atu harii nune’e parlamentu nakloke no transparente liuhosi jornalista sira hodi divulga informasaun sira kona-ba atividade palamentár nian.

“Uma komunikasaun ne’e hodi garante informasaun ne’ebé kualidade no divulga polítika informasaun kona-ba servisu parlamentu nian. Tanba, loke informasaun sei lori envolvimentu sidadaun sira-nian atu hatene no halo análize ba ativitidade parlamentár nian,” nia dehan.

Sekretária Jerál Parlamentu Nasionál, Cedelizia Faria dos Santos, informa programa ne’e sei finánsia hosi PNUD ho durasaun tarde liu fulan tolu.

“Uma Komunikasaun ne’e konstrui hahú hosi outubru, novembru no dezembru. Projetu ida-ne’e 100% apoia hosi PNUD, parlamentu nein tau osan ida. Ba uma komunikasaun de’it $100 mill maibé inklui mós formasaun ba jornalista sira, ekipamentu hamutuk $232 mill maibé orsamentu ne’e sira mak jere rasik. Ami hein simu xave de’it,” nia hateten.

Iha lansamentu primeira pedra ba uma komunikasaun ne’e partisipa hosi Sekretáriu Estadu Komunikasaun Sosiál (SEKOMS) Mericio Juvinal “Akara”, Prezidente Konsellu Imprensa (CI) Virgílio da Silva Guterres no deputadu sira.

Jornalista: Evaristo Soares Martins

Editór: Cancio Ximes

HAKEREK NO HATÁN

Please enter your comment!
Please enter your name here