Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 30 setembru 2020 (TATOLI)—Ministériu Obra Públika (MOP) hakarak kria regumentu liuhosi despaisu ministeriál, bainhira halo konstrusaun edifísiu públiku tenke akomoda asesibilidade ba ema ho defisiénsia fízika.

Tuir Ministru  Obra Públika, Salvador Eugênio dos Reis Pires, daudaun ne’e inisia ona ezbosu lei tolu hanesan konstrusaun sivíl, kódigu edifísiu no padraun abitasaun, ne’ebé iha lejizlasaun ne’e mensiona kona-ba asesibilidade ba ema hotu.

“Ami sei deikute ho Ministru Prezidénsia Konsellu Ministru atu lei tolu ne’e bainhira promulga, ministériu sira seluk bele promove projetu edifísiu públiku ne’ebé bele akomoda ema ho defisiénsia sira-nia nesesidade,” tenik Ministru Salvador iha Palásiu Governu, kuarta ne’e.

Notísia Relevante: Ema ho difisiénsia sente diskrimina iha asesibilidade fízika

Ministru Salvador Entrega Esbosu Dekretu-Lei Tolu Planu Urbanu ba MPO

Governante ne’e dehan, bainhira lejizlasaun ne’e vigora, maka kada konstrusaun sivíl atu hetan lisensiamentu tenke akomoda ema defisiénsia ninia nesesidade.

“Ami tenta atu hasai despaisu bazeia ba MOP, liuliu ba investimentu edifísiu públiku sira tenke liuhosi sertifikasaun.” nia katak.

Aleinde ne’e, MOP entrega ona ezbosu dekretu-lei tolu kona-ba planu urbanu hanesan hanesan jestaun trritoriál, klasifikasaun uzu solu no urbanizasaun inklui edifikasaun urbanu ba Vise Primeiru-Ministru no Ministru Planu no Ordenamentu, José Maria dos Reis.

“Daudaun ne’e pasa ona ba Ministru Planu no Ordenamentu  hodi haree. Iha tempu badak kuandu lori bá Konsellu Ministru, aprovadu no promulgadu maka ita bele deriva fali kódigu edifísiu no kódigu kostrusaun sivíl,” nia akresenta.

Tuir governante ne’e, lei tolu hanesan derivada hosi planeamentu urbanu no ordenamentu territoriál.

“Urbanizasaun no edifiksaun ita bele deriva fali hanesan padraun kotrusaun sivíl, kódigu edifísiu, no padraun abitasaun ne’ebé obriga se de’it maka halo investimentu ba edifísiu ka halo konstrusaun públiku tenke asesível ba ema hotu” nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here