Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 30 setembru 2020 (TATOLI)–Ministru Obra Públika, Salvador Eugênio dos Reis Pires, lamenta ho rejeita karta ho asinatura hosi nia parte, ne’ebé fó orden serbisu ba konstrusaun projetu loke estrada alternativu hosi postu administrativu Maucatar, munisípiu Covalima ba kompañia Lakirin Ghol Unipessoal, Lda.

Informasaun ne’e espalla iha rede sosiál, Facebook no konsege sai diskusaun.

Governante ne’e dehan, kazu falsifikasaun dokumentu ne’ebé akontese iha Ministériu Obra Públika (MOP) ho ida ne’e hamutuk lima, maibé restante haat seluk hato’o ona keixa ba parte kompetente sira no prosesu la’o hela.

“Agora kazu ne’e ita presiza kesar tan tanba karta ne’e mai ho asinatura falsu. Ha’u-nia asinatura la’ós hanesan ne’e. Ha’u seidauk hasai orden traballu ida sein liuhosi prosesu aprovizionamentu,” hateten Ministru Salvador, iha Palásiu Governu, kuarta ne’e.

Tanba ne’e, MOP hato’o ona keixa ba Ministériu Públika (MP) atu prosesa tuir dala legál.

“Falsifikasaun dokumentu ne’e rasik la’ós foin maka akontese ida de’it. Tanba ne’e, ami haruka ona ba Ministáriu Públiku no kopia mós ba Polísia Sientífika Investigasaun Kriminál (PCIC, sigla portugés), Ministériu Justisa (MJ), Primeiru-Ministru inklui Komisaun Antí-Korrupsaun (CAC, sigla portugés) atu haree no halo investigasaun ninia orijinalidade mai hosi ne’ebé no sé maka halo ida-ne’e?,” nia akresenta.

Jornalista: Natalino Costa

Editora : Julia Chatarina 

HAKEREK NO HATÁN

Please enter your comment!
Please enter your name here