Diretór Jerál Ministériu Administrasaun Estatál (MAE), Belarmino Filomeno Neves. Imajen Tatoli/Osória Marques

DILI, 30 setembru 2020(TATOLI)–Diretór Jerál Ministériu Administrasaun Estatál (MAE), Belarmino Filomeno Neves, informa MAE iha dívida ba suku farda ba xefe suku sira-nian de’it ho montante hamutuk $205,660. Tuir planu, Governu sei selu dívida ne’e hafoin Orsamentu Jerál Estadu 2020 aprovadu.

Notísia Relevante: MAE sei la selu dívida ne’ebé laiha kontratu

“Ministériu Administrasaun Estatál iha dívida hamutuk $205,660 maibé ne’e ba farda xefe suku sira nian de’it. Durante ne’e, MAE laiha dívida seluk. Tuir planu, hafoin aprova OJE 2020 agora ne’e mak MAE sei selu hotu,” dehan Diretór Jerál MAE, Belarmino Filomeno Neves, ba Agência TATOLI, iha nia knaar fatin Colmera, Dili, kuarta ne’e.

Nia hateten, dívida ne’e MAE seidauk bele selu tanba planu suku farda ba xefe suku sira-ne’e akontese iha tinan 2019 maibé tanba Orsamentu Jerál Estadu (OJE) 2020 la passa ka sumba entaun labele selu kompañia ne’ebé manan tender ba suku farda refere.

“Ita-nia OJE 2020 mak sumba tiha, nune’e ita labele selu. Karik OJE 2020 mak la sumba iha momentu ne’ebá, parese ita selu hotu ona. Tanba OJE sumba ne’e mak ita iha dívida ba farda xefe suku sira-nian ne’e,” nia hateten.

Maske, nia dehan, daudaun ne’e farda xefe suku sira-nian ne’e Governu distribui hotu ona ba xefe suku sira iha Timor laran tomak maibe bainhira MAE atu selu dívida ne’e tenke bazea ba karta kontratu.

Antes ne’e kompañia hamutuk sia (9) mak compete iha konkursu suku farda ba xefe suku sira-nian ne’e maibé to’o ikus kompañia MARLVI UNIP, Lda, mak sai vensedór.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here