Hare iha Atabae. Imajen Tatoli/António Gonçalves

DILI, 30 setembru 2020 (TATOLI)-Institutu ba monitór no analiza dezenvolvimentu Timor-Leste, La’o Hamutuk rekomenda ba Governu atu diversifika produsaun ai-han rai-laran hodi hasai dependénsia ba importasaun foos no ai-han seluk.

Governu no entidade relevante sira presiza hametin no diversifika produsaun ai-han iha rai-laran hodi eleva kualidade moris povu no hametin ekonomia família,” refere nota hosi La’o Hamutuk ne’ebé Agência Tatoli asesu iha kuarta ne’e.

Organizasaun Naun Governamentál (ONG) ne’e nota katak alokasaun orsamentu ba kurtu prazu rekuperasaun ekonómika ho montante millaun 113,4 ne’ebé implementa jullu to’o dezembru 2020, hatudu katak Governu iha kompromisu atu prevene situasaun urjénsia.

“Ami sujere atu Governu presiza investe iha setór produtivu no setór sosiál sira hodi bele ajuda Timor-Leste bele adapta iha krize saida de’it,” afirma  sosiedade sivíl.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

Aleinde ne’e, La’o Hamutuk haree katak situasaun produsaun agrikultura iha rai-laran to’o 2020 hatudu katak setór produtivu seidauk dezenvolve didi’ak hodi hamenus dependénsia ba fundu petrolíferu ne’ebé limitadu.

Haree mós katak iha setór agrikultura, produsaun ai-han nafatin laiha mudansa signifikante kompara ho tinan sanulu liu ba no laiha diversifikasaun ai-han atu hamenus dependénsia ba importasaun foos.

Tuir dadus, iha tinan 2019 Timor-Leste nia produsaun foos nasionál hamutuk millaun 47,822 ne’ebé kuaze hanesan kompara ho tinan 2008 ho kuantidade milllaun 48,154, enkuantu produsaun batar iha 2019 tuun ba millaun 75,690, ne’ebé konsidera menus kompara ho produsaun iha 2015 hamutuk millaun 95,433.

“Situasaun ne’e halo ita-nia dependénsia ba ai-han importadu sira aumenta ba beibeik no bainhira hasoru situasaun hanesan COVID-19, ita hetan ameasa boot ba seguransa ai-han. Setór agrikultura sai fonte ai-han no rendimentu prinsipál maibé setór ne’e kontinua la hetan prioridade,” ONG ne’e fó hanoin.

Tanba ne’e, sosiedade sivíl ne’e konsidera presiza vontade polítika no vizaun estratéjiku hosi Governu atu dezenvolve no proteje setór agrikultura hodi sai pilár forte ba ekonomia.

“Tanba laiha vontade polítika, vizaun no estratéjia ne’ebé klaru, alokasaun orsamentu kada tinan ba agrikultura (alokasaun orsamentu 2020 menus hosi porsentu ida) kontinua gasta barak ba sosa no fahe fini, adubu no mákina sira halo produsaun, maibé la konsege transforma setór agrikultura sai setór ida ne’ebé forte,” subliña La’o Hamutuk.

Nune’e mós, institutu ne’e observa to’o ohin loron, produsaun ai-han la sa’e no área kultivasaun tuun ba beibeik, dadus estatístika agrikultura la kompletu no la kredível, tanba ne’e ONG ne’e husu Ministériu Agrikultura no Peska (MAP) kontrola moras animál hanesan African Swine Flu, indústria prosesamentu produtu agrikultura la dezenvolvidu tanba  kada tinan importasaun ai-han sa’e ba beibeik.

Sosiedade sivíl ne’e, nota katak Ministériu Koordenadór Asuntu Ekonómiku (MKAE) hahú koordena ona ho Ministériu Turizmu komérsiu, no Indústria (MTKI), Sekretaria Estadu Kooperativa (SEKoop) no MAP atu mobiliza agrikultór sira hasa’e produsaun ai-han iha rai-laran hodi fornese ba cesta bázika, tanba ne’e ONG ne’e enkoraja atu Governu bele intensifika atividade ne’e.

“Ami fiar programa foun ne’e la’o ho mekanizmu klaru, liu-liu atu sosa produtu agríkola iha merkadu lokál hosi agrikultór rasik ho intensivu hodi hametin ekonomia iha baze no iha territóriu tomak,” akresenta.

Biban ne’e, La’o Hamutuk rekomenda Governu atu asegura katak programa cesta bázika ne’ebé sei oferese hanesan voucher bele válidu ba iha merkadu lokál sira, atu nune’e benefísiu hosi programa ne’e bele hadi’ak direta ekonomia povu kiik sira.

“Ami hein katak orsamentu 2020 bele hahú halo diskusaun kle’an ba setór save sira no ami mós rekoñese katak orsamentu tinan ne’e la mosu iha situasaun normál atu halo diskusaun, maibé ami espera bele hahú halo diskusaun kle’an liután ba iha orsamentu 2021 kona-ba setór produtivu sira,” katak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here