Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, kuarta, (30/09). Imajen /Egas Cristovão

DILI, 30 setembru 2020 (TATOLI)-Konsellu Superiór Defeza no Seguransa (KSDS) ho Konsellu Estadu (KE) rekomenda ba Prezidente Repúblika, Francisco Guterres Lú Olo, atu kontinua hato’o pedidu ba Parlamentu Nasionál hodi estende tan Estadu Emerjénsia ba daneen hodi halo prevensaun ba transmisaun surtu COVID-19 iha Timor-Leste.

KSDS no KE foti desizaun ne’e durante enkontru entre Konsellu Superiór Defeza no Seguransa (KSDS) ho Konsellu Estadu (KE), kuarta ne’e iha Palasiu Prezidensia Bairru-Pité Dili.

Notísia Relevante :Governu propoin PR dekreta Estadu Emerjénsia ba daneen

Razaun husi pedidu ne’e maka atu bele kontrola movimentu sidadaun iha área fronteira no kuarentena obrigatóriu sira hodi halo prevensaun ba moras coronavirus.

Xefe Kaza Sivíl Prezidénsia Repúblika, Francisco Maria de Vasconcelos, hateten medida Estadu Emerjénsia ba fulan ida ne’e sei restridu liután iha fronteira  liliu kontrola movimentu ema tama no sai iha área fronteira inklui kontrola okupante kuarentena obrigatóriu.

“Medida Estadu Emerjénsia ne’e sei hanesan nafatin ho fulan kotuk nian so que iha fronteira no kuarentena sira mak restridu liután hodi kuidadu ita-nia sidadaun sira labele hada’et moras ne’e,” katak nia ba jornalista sira iha Palasiu Prezidénsia Bairru-Pité Dili, ohin.

Entretantu, Governu liuhosi reuniaun Konsellu-Ministru, iha semana kotuk propoin on aba Prezidente Repúblika atu dekreta tan Estadu Emerjénsia daneen durante loron 30.

Enkontru KSDS no KE ne’e prezide husi Prezidente Repúblika, Francisco Guterres Lú Olo, no hetan partisipasaun husi Governu, Parlamentu Nasionál, Polisia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no seluk tan.

Notísia Relevante :Xefe Estadu konvoka reuniaun ho KSDS-Konsellu Estadu relasiona ho EE

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here