Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

DILI, 30 setembru 2020 (TATOLI)—Komisaun A (Justisa no Konstitusionál) iha Parlamentu Nasionál husu VIII Governu Konstitusionál ne’ebé lidera hosi Primeiru-Ministru Taur Matan Ruak atu hadi’a sistema governasaun ligadu ba ezekusaun orsamentál.

Prezidente Komisaun A, Deputadu Joaquim dos Santos, hateten rekomendasaun ne’e informa ona durante audiénsia públika ho membru Governu nune’e labele fó efeitu negativu ba ezekusaun Orsamentu Jerál Estadu 2020 nian.

Nia dehan, durante ne’e Governu moris ho Dotasaun Orsamentu Temporáriu (DOT) no  estrutura lei  organiku Governu la kompletu entaun prezudika ezekusaun ladún la’o di’ak.

Komisaun A rekomenda ba institusaun Governu ninia ne’ebé mak foin kompleta estrutura lei orgánika Governu nian atu define didi’ak mekanizmu ezekusaun orsamentu jerál estadu.

“Haree ema sira-ne’ebé iha duni kapasidade mak aloka ba kna’ar sira (finansa públika), labele naran tau ema ne’ebé laiha kapasidade ba gasta osan laloos. Ida-ne’e apenas rekomendasaun hosi komisaun deteta depois husu ba Governu atu hadi’a intermu organizasaun. Komisaun mós rekomenda para atu hadi’a sasán sira-ne’ebé to’o ohin loron seidauk loos ne’e, hanesan sistema governasaun,” Deputadu Joaquim dos Santos, informa ba jornalista sira iha resintu Parlamentu Nasionál, foin lalais.

Nia hateten, ema sira-ne’ebé hola parte estrutura ne’e tenke hala’o servisu loloos, servisu tuir lei  no labele inventa sasán nune’e ezekusaun Orsamentu Jeral Estadu (OJE) nian ne’e bele tuir lei haruka no bele ba to’o povu nu’udar benefisiáriu.

Prezidente Komisaun A dehan, ida-ne’e rekomendasaun jenériku ka rekomedasaun jerál tanba hakarak VIII Governu ne’e tenke sai diferensa ho Governu tinan hirak ba kotuk nune’e garante governasaun di’ak.

“Atu hamosu Governu ida-ne’ebé di’ak entaun sasán sira-ne’ebé mak naksalak durante Governu sira kotuk halo, Governu ida-ne’e labele repete fali. Tanba ne’e mak komisaun rekomenda entermu polítiku organizasaun atu ezekuta osan Estadu nian ho di’ak,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here