Xefe Estadu Maiór F-FDTL, Koronel Calisto Santos Coli “Coliati” no Komandante F-FDTL sira seluk hasai fotografia hamutuk ho forsa Austrália no Amerika, hafoin abertura ezersísiu “Harii Hamutuk” iha Komandu Terrestre Baucau. Imajen/F-FDTL

DILI, 30 setembru 2020 (TATOLI)- Forsa nasaun tolu, kompostu hosi FALINTIL-Forsa Defeza Timor-Leste (F-FDTL), Forsa Defeza Austrália no Forsa Defeza Estadu Unidus (EU) ofisiálmente abertura ezersísiu “Harii Hamutuk” 2020 ne’ebé hala’o iha Komandu F-FDTL Komponente Terrestre Baucau.

Xefe Estadu Maiór F-FDTL, Koronél Calisto Santos Coli “Coliati” dehan, ezersísiu “Harii Hamutuk” ne’e halo hodi fahe esperiénsia ba malu entre forsa armada sira, nune’e mós kapasita forsa F-FDTL iha área enjeñaria, eletrisidade, soldadura no atividade seluk tan.

“Ohin, mai halo abertura ba sétimu Ezersísiu “Harii Hamutuk” hanesan ezersísiu ida ne’ebé tinan-tinan, FALINTIL-FDTL hala’o hamutuk ho militár hosi Estadus Unidus, Austrália no mós hosi Japaun,” informa Komandante Coliati ba jornalista.

Nia dehan, treinamentu tinan ne’e loloos hetan partisipasaun hosi forsa Japaun sira, maibé tanba problema surtu COVID-19 ataka mundu tomak, tanba ne’e forsa Japaun labele partisipa.

Ezersísiu “Harii Hamutuk”, tinan ne’e, sei kontinua foka iha formasaun área enjeñaria nian no daudaun ne’e ekipa prepara ona programa hodi hein implementa programa barak durante treinamentu hala’o.

“Atividade barak maka sei hala’o iha área enjeñaria nian hanesan hadi’a fasilidade iha baze komponente Terrestre nian, hadi’a uma eskola sira, no ba área fronteira iha área Postu Cova-Munisípiu Covalima monta solar panel hodi fó enerjia  ba  forsa sira ne’ebé halo seguransa iha ne’ebá,” nia hateten.

Nia apela ba membru sira ne’ebé tuir formasaun atu uza oportunidade ne’e hodi aprende buat barak,  dixiplina no kumpre regra, atu nune’e, formasaun ne’e termina sira bele iha ona esperiénsia barak.

Nia husu mós ba membru sira atu aprende mós lian Ingles hodi hasa’e sira nia koñesimentu iha lingua. Formasaun ne’e, partisipa direita hosi membru F-FDTL komponente hotu hamutuk na’in-100-resin inklui forsa Austrália no Amerika. Formasaun ne’e lansa iha loron 29 setembru no  sei termina iha loron 19 outubru 2020.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here