Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (30/09). Imajen Tatoli/António Gonçalves

DILI, 30 setembru 2020 (TATOLI)—Liuhosi reuniaun Konsellu Ministru (KM) iha kuarta ne’e, Vise-Ministra Finansa, Sara Lobo Brites, aprezenta projetu deliberasaun ne’ebé fixa Dotasaun Orsamentu Temporáriu (DOT) ba fulan-outubru tinan 2020.

“Konsellu Ministru aprova ona projetu deliberasaun relasiona ho tetu finál ba DOT fulan-outubru 2020 ho valór millaun $117,1,” relata Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu.

Montante ne’ebé define inklui ona ho pagamentu empréstimu sira.

Totál alokasaun DOT ba 01 janeiru to’o 31 agostu 2020 hamutuk millaun $954,5, ne’ebé distribui ba liña ministeriál, órgaun autónoma sein reseita propria no serbisu fundu autónoma sira.

Hosi millaun $954,5 ne’e, Governu ezekuta ona millaun $479,3, ne’ebé reprezenta saláriu no vensimentu millaun $123,6, bens no servisu millaun $151,3, kapitál menór millaun $2,2, transferénsia públika millaun $70,5, kapitál dezenvolvimentu millaun $120,8 no fundu rezerva kontijénsia millaun $10,6.

Despeza orsamentu temporáriu ne’e hetan finansiamentu hosi reseita doméstika ho valór millaun $117,4.

Antes ne’e, Governu fixa DOT ba setembru hamutuk millaun $$119,6, enkuantu tetu ba agostu millaun $118.

Ba fulan-jullu Governu fixa DOT ho valór millaun $120,531.5 ne’ebé inklui mós pagamentu ba empréstimu, enkuantu eksklui empréstimu sai millaun $113,281.5, ne’ebé fahe ba kategoria lima hanesan saláriu no vensimentu millaun $17,981,2, bens no servisu millaun $40,186.7, tranferénsia públika millaun $26,721.1, kapitál menór millaun $2,251.1 no kapitál dezenvolvimentu millaun $33,391.

DOT ba juñu ho montante millaun $122,3 inklui pagamentu ba empréstimu.

Governu fixa DOT ba maiu nian ho montante millaun $122 (inklui empréstimu) maibé bainhira esklui empréstimu millaun $114, ne’ebé fahe ba kategoria haat hanesan saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menór.

Vise-Ministra Finansa, Sara Lobo Brites, antes ne’e informa ona katak durante implementasaun Estadu Emerjénsia Governu ladún iha atividade tanba ne’e maka gastu reál mensál hamutuk pur volta millaun $56 to’o millaun $65.

Utilizasaun rejime duodesimál hahú kedas iha janeiru 2020 to’o agora tanba Proposta Lei Orsamentu Jerál Estadu (OJE) 2020 la pasa.

Nune’e, rejime duodesimál sei ramata automatikamente bainhira orsamentu 2020 tama iha vigór.

Regra no prosedimentu aplikasaun rejime duodesimál ba instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define ona tuir Lei OJE númeru 13/2016.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here