Ministru Agrikultura no Peska, Pedro dos Reis. Imajen Tatoli/Egas Cristovão

DILI, 30 setembru 2020 (TATOLI)-Ministériu Agrikultura no Peska (MAP) seidauk publika rezultadu sensu agríkola 2019 tanba dadus balun presiza atualiza.

MAP lansa sensu agríkola iha 13 agostu 2019 no sensu ne’e ba dahuluk hafoin Timor-Leste ukun-an, maski antes ne’e Ministériu Finansa (MF) realiza ona sensu uma kain.

Ministru Agrikultura no Peska, Pedro dos Reis, hateten bainhira simu rezultadu hosi Diresaun Jerál Estatistika MF, presiza haree didi’ak dadus balun molok públika relatóriu nune’e bele relata informasaun kompletu.

“Horiseik (tersa) Diresaun Jerál Estatístika hasoru ha’u hodi ko’alia kona-ba kestaun ne’e, atu fó sai ona rezultadu maibé iha dadus balun maka iha mudansa oituan,” dehan Ministru Pedro dos Reis, iha Palásiu Governu, kuarta ne’e.

Notísia Relevante: MAP Reajusta Dadus Sensu Agríkola Molok Lansa iha Abríl

Relatóriu Sensu Agríkola: Porsentu 66 Uma-Kain iha Timor-Leste Halo Atividade Agrikultura

Tuir governante ne’e, dadus ne’ebé iha mudansa maka ba fahi nian, tanba bainhira ramata sensu agríkola 2019 maka iha sirkulasaun moras peste Áfrika (ASF, sigla Inglés).

“Sensu ramata maka moras fahi nian mosu, entaun dadus sira ne’e labele publika enkuantu númeru ne’e iha mudansa tanba kuandu sensu ne’e ramata fahi barak maka mate tanba moras ne’e,” nia esplika.

Tuir Ministru sei la halo tan sensu foun maibé sei buka maneira atu atualiza dadus ba fahi nian.

Relasiona ho mudansa dadus, seidauk iha desizaun fiksu atu publika rezultadu sensu agíkola 2019 tanba sei okupadu ho diskusaun ba Orsamentu Jerál Estadu (OJE) 2020 no 2021 nian.

Programa ne’e lansa hosi eis Ministru Agrikultura no Peska, Joaquim José Gusmão dos Reis Martins, no programa ne’e finansia ho OJE hamutuk millaun $5.

Sensu ne’e halo ba uma-kain 213.741 hosi totál populasaun Timor-Leste millaun 1,2 no hosi rezultadu preleminár hatudu katak porsentu 66 populasaun maka hala’o atividade agrikultura.

Enkuantu, haree ba xefe uma-kain reprezenta porsentu 15 maka feto no  porsentu 85 mane.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here