Vise-Prezidente Parlamentu Nasionál, Maria Angelina Lopez Sarmento. Foto Tatoli/ Egas Cristóvão

DILI, 30 setembru 2020 (TATOLI)—Parlamentu Nasionál (PN), aban, sei debate proposta Orsamentu Jerál Estadu (OJE) 2020 ho montante biliaun $1.497,1 iha faze jeneralidade.

Hosi montante orsamentu biliaun $1.497,1 ne’e prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Montante orsamentu biliaun $1.497,1 ne’e, Governu ezekuta ona balun hahú hosi janeiru to’o setembru 2020 liuhosi Dotasaun Temporáriu Orsamentál (DOT).

Reuniaun líder bankada parlamentár iha loron 28 setembru 2020 ne’e deside, diskusaun iha faze jeneraliadade sei hahú hosi loron 01 outubru to’o loron 02 outubru 2020.

“Ami aprova ona giaun (matadalan) ba  debate. Tanba ne’e, kona-ba debate Orsamentu Jerál Estadu 2020 nian sei komesa iha loron 01 to’o 02 outubru 2020 ba debate jeneralidade. Depois iha loron 05 outubru (segunda) kontinua fali debate espesialidade nian tanba debate espesialidade haan tempu loron 04 de’it no loron 08 outubru 2020 halo aprovasaun finál globál,” Vise-Prezidente Parlamentu Nasionál, Deputada Maria Angelina Sarmento Lopes, informa ba jornalista sira, segunda ne’e.

Nia haktuir, iha reuniaun lider Bankada deside debate jeneralidade no espesialidade ba proposta Orsamentu Jerál Estadu (OJE) loron 7 de’it, tanba atu fó biban ba Governu hodi bele ezekuta orsamentu ne’e.

Nia hatutan, iha sesta loron 09 outubru 2020 sei enkamiña proposta orsamentu ba Prezidente Repúblika hodi bele halo promulgasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here