Prezidente APFTL, Zaulino Gomes da Silva.Imajen/Felicidade Ximenes.

DILI, 29 setembru 2020 (TATOLI)-Zaulino Gomes da Silva, re-eleitu ba Prezidente Alumni Parlamentu Foinsa’e Timor-Leste (APFTL), ba periodu 2020-2025 durante kongresu daruak APFTL nian ne’ebé hala’o iha loron 25 to’o 27 fulan-setembru ne’e iha salaun Madre Canosa Becora Dili.

Mandatu dahuluk iha 2015 to’o 2020, no daudaun ne’e nia re-eleitu tan ba tinan lima hodi lidera organizasaun ne’e.

Notísia Relevante :Kongresu daruak, APFTL diskute asuntu importante tolu

Durante kongresu, kongresista sira aprezenta pakote rua hodi halo eleisaun, pakote dahuluk maka Ernestina Barros ho votu 10, no Zaulino Gomes da Silva hetan votus 134.

”Objetivu estratéjiku ne’ebé mak ami aprova iha kongresu mak husi oinsá atu operasionaliza objetivu sira ne’e ba iha planu estratejia 2021- 2025,” Prezidente Eleitu, Zaulino Gomes da Silva, ba Tatoli via telefone, tersa (29/09).

Planu estratéjiku APFTL nian ida mak ko’alia kona-ba joven iha abilidade fiziku no saudavel, joven produtivu no kompetetivu durante tinan lima nune’e foinsa’e sira bele hola parte iha prosesu dezenvolvimentu.

”Orientasaun ba oin ha’u fó nafatin hanoin ba joven sira para oinsá bele hola parte iha setór agrikultura para joven sira iha kreatividade atu oinsá sira kria rasik sira-nia empregu para atu motiva joven sira hateke ba oin setór agrikultura ne’e sai setór ida ne’ebé mak bele muda sira-nia moris,” nia hateten.

Alumni Parlamentu Foinsa’e Timor-Leste (APFTL), hamrik ho ninia objetivu atu dezenvolve kapasidade foinsa’e sira nian ba atinje objetivu haat maka hanesan rezilente, vizionáriu, demokrátiku no sivilizadu ba apoiu dezenvolvimentu nasionál.

Entertantu, Alumni Parlamentu Foinsa’e Timor-Leste (APFTL), daudaun ne’e iha membru hamutuk 387 hafoin ejiste iha tinan 2015 liubá.

Notísia Relevante :APFTL hakarak lori joven sira ba atinje objetivu haat

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here