Komandante Polísia Munisípiu Dili, Superintendente Xefe Henrique da Costa no Administradór Postu Administrativu Don Aleixo, Tomas Barros, hasai fotografia hamutuk ho membru OPS no autoridade suku sira. Imajen/PNTL

DILI, 29 setembru 2020 (TATOLI)- Komandante Polísia Nasional Timor-Leste (PNTL) Munisípiu Dili hala’o vizita servisu ba Postu Administrativu Don Aleixo, Munisípiu Dili, hodi ko’alia ho autoridade lokál sira oinsá servisu hamutuk hodi sensibiliza programa lori dame no moris hakmatek ba povu sira.

Notísia Relevante : Semana ne’e, Polísia rejista kazu krime 41

Komandante Munisípiu Dili, Superintendente Xefe Henrique da Costa, hateten autoridade sira mak lider másimu besik liu povu presiza kria kooperasaun hodi sensibiliza paz ba povu.

“Ami nia enkontru ho administradór postu ho xefe suku no Ofisial Polísia Suku (OPS) iha postu Don Aleixo nian ho objetivu atu introdús ha’u nia aan no hato’o mós kona-ba programa no estratéjia komandu nian, oinsá bele hala’o seguransa iha Munisípiu Dili,” hateten Superintendente Xefe, Henrique da Costa, liuhosi karta komunikadu ne’ebé Agência Tatoli asesu hosi Komandu Jerál PNTL, ohin.

Nia dehan, atu garante seguransa presiza hetan apoiu másimu hosi autoridade lokál sira, tanba sira maka servisu besik liu ho komunidade no ukun reinu no sira servisu hamutuk bele ajuda PNTL hodi garante seguransa.

“Autoridade lokál sira-nia preokupasaun maka atu reativa fali Konsellu Polisiamentu Komunitária (KPK) no bele halo treinamentu ba KPK sira, atu nune’e, sira halo servisu apoiu polísia, sira mós husu atu aumenta polísia iha suku tanba populasaun barak no ita koloka OPS ida de’it labele atende problema ka situasaun ne’ebé maka akontese,”  tenik nia.

Komandu PNTL Dili sei halo esforsu ba futuru sei koloka tan membru OPS iha kada suku no aldeia hodi lori misaun servisu hakbesik ba povu.

Iha fatin hanesan, Administradór Postu Administrativu Don Aleixo, Tomas Barros hato’o agradese ba Komandante Munisípiu Dili nia inisiativa di’ak atu ko’alia ho autoridade lokál kria koordenasaun no amizade fahe informasaun hodi kria unidade no halo aproximasaun di’ak hodi konsolida komunidade sira liu-liu iha fatin hirak ne’ebé risku konflitu.

Tomas dehan, suku no aldeia sira atu moris hakmatek presiza tebes  sosiedade no joven sira kria unidade no armonia iha Dili laran hodi redús konflitu entre organizasaun juventude.

“Ami agradese  planu komandu oinsá besik ba bairru-bairru, Polísia besik ba iha eskola, vizita tama-sai uma hodi hakbesik aan ba povu, nune’e, komunidade sira labele trauma ho Polísia nia prezensa, no polisia nia prezensa atu fó seguransa, no atende problema ruma ne’ebé mosu no kria oinsá joven sira labele moris iha konflitu laran,” nia hateten.

Nu’udar lideransa sei introdús ba autoridade suku kontrola mós atividade juventude sira labele tuur iha estrada ibun, hemu tua lanu iha dalan-dalan no provoka ema no karreta ne’ebé liu iha dalan  públiku.

Komandante Polísia Munisípiu Dili sei halo mós vizita ba Postu Administrativu Vera Cruz, Nain-Feto, Cristo Rei, Metinaro no Atauro.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here