Prezidente Parlamentu Nasionál, Aniceto Longuinhos Guterres Lopes, observa hela esketsa futuru edifísiu própriu Parlamentu Nasional. Esketsa dezeña ne’e hala’o iha lejislatura dahuluk nia tempu. Imajen/Evaristo Soares Martins.

DILI, 29 setembru 2020 (TATOLI)—Konsellu Administrasaun Parlamentu Nasionál nian pevee millaun $3 ba tinan fiskál 2021 hodi harii sede própriu Parlamentu Nasionál nian.

Notísia Relevante: OJE 2020 Sumba Iha PN Sei Afeita ba Konstrusaun Edifísiu PNTL

Prezidente Parlamentu Nasionál inisia atu harii sede foun ne’e bazea ba Lei Organizasaun no Funsionamentu Parlamentár (LOFAP) nú.12/2017, 24 maiu fó dalan.

Prezidente Parlamentu Nasionál, Deputadu Aniceto Longuinhos Guterres Lopes, esplika osan millaun $3 ne’e prevee hotu ba estudu, dezeñu, lansamentu no traballu inisiál sira-ne’ebé bele la’o daudaun ona kuandu hahú ona lansamentu.

“Osan millaun $3 ne’e ita parevee maibé até informasaun hosi Governu rekomenda karik bele to’o millaun $5. Verba ida-ne’e depois aprovasaun to’o iha Governu atu integra iha Orsamentu Jerál Estadu (OJE) ne’e tranzita ba iha Fundu Infraestrutura,”  Prezidente Parlamentu Nasionál, Aniceto Longuinhos Guterres Lopes, informa liuhosi plenária, Parlamentu Nasionál, tersa ne’e.

Entretantu orsamentu millaun $3 prevee iha rúbrika kapitál dezenvolvimentu ba tinan fiskál 2021. Sede Parlamentu Nasionál foun ne’e sei harii iha Hera, Postu Administrativu Cristo Rei, Munisípiu Dili. Rai ne’ebé atu konstrui sede foun ne’e ektare ualu (8).

Nia dehan, ideia atu konstrui edifísiu própriu Parlamentu Nasionál  nian hahú kedas dezde plejizlatura dahuluk to’o agora, la’ós hanoin foun.

Razaun Pezidente Parlamentu Nasionál atu konstrui sede foun ne’e tanba  deputadu ida simu $450 ba alojamentu kada fulan.

Aniceto Guterres halo kalkulasaun, tinan ida (1) deputadu ida hetan $5.400 no sura deputadu na’in-65 entaun kada fulan gasta $351.000,00. Nune’e iha  lejizlatura ida (tinan 5) Estadu gasta $1.755.000,00 ba dei’t alojamentu.

Notísia Relevante: Vizaun atu harii edifísiu própriu PN tanba kada lejislatura gasta $1.755.000,00

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here