Aniceto Guterres, Prezidente Parlamentu Nasional. Imajen/Antonio Goncalves

DILI, 29 setembru 2020 (TATOLI)—Konsellu Administrasaun Parlamentu Nasionál (PN) prevee orsamentu $315.000 atu sosa karreta opeasionál foun iha tinan 2021.

Notísia Relevante: PN prioritiza programa 5 ba 2021

Orsamentu $315.000 ne’e prevee iha rúbrika kapitál minór liuhosi Diresaun Jerál Finansa (DGF-sigla portugés) Parlamentu Nasionál nian. Orsamentu $315.000 ne’e hosi orsamentu privativu Parlamentu Nasionál $16.984.066.

“Kona-ba sosa karreta ne’e, ne’e karreta operasionál la’ós karreta ba deputadu sira. Karreta operasionál ne’e liga mós ho karreta tuan sira-ne’ebé atu lelaun iha tinan 2021,” Prezidente Parlamentu Nasionál, Deputadu Aniceto Longuinhos Guterres Lopes, pronunsia iha ámbitu diebate orsamentu privativu liuhosi plenária, tersa ne’e.

Deputadu Aniceto Guterres fundamenta, tenke sosa karreta operasionál hodi hatán ba karreta deputadu sira-ne’ebé enfrenta dezastre ruma ka kondisaun aat grave, liuliu iha atividade fiskalizasaun sira.

“Esperiénsia durante ne’e kuandu problema dezastre, deputadu sira-nia karreta aat ka aat grave ne’e hotu-hotu rekorre ba karreta operasionál. Até karreta foun de’it mós ita-nia problema mak ne’e karreta foun foin to’o iha prlamentu depois deputadu simu, foin sai hosi parlamentu sa’e ba rai-lolon ne’ebá karreta sa’e labele, depois mai husu fali karreta operasionál,” nia esplika

 Prezidente PN ne’e dehan, sosa karreta operasionál foun ne’e ho verba $315.000 atu antesipa situasaun hirak ne’e mosu kualkér atividade parlamentár nian.

“Ita hakarak viajen lokál ne’e iha kualkér momentu transporte parlamentu nian tenke prontu para fasilita deputadu sira, liuliu viajen ba fiskalizasaun sira-ne’e,” nia dehan.

Entretantu, Sekretária Jerál Parlamentu Nasionál Cedelizia Faria dos Santos, reforsa atu halo lelaun ba viatura no mós motorizada hodi fó mós reseita ba estadu.

“Ho kalkúlu ne’ebé ami halo ba motorizada ne’ebé mak ita atu halo lelaun ho montante $19.550. Ita la konta viatura hotu, ita konta de’it viatura 8 ne’ebé mak ita atu sosa foun. Ita sosa foun mak ita halo lelaun. Se ita halo lelaun tiha, ita la sosa entaun problema ba ita tanba laiha viatura. Ninia montante mak $55.000,” nia haktuir.

Sekretária Jerál PN ne’e fó-sai katak bainhira halo hotu lelaun tantu viatura no motorizada parlamentu bele hetan reseita $74.550.

“Maibé ami la tau montante ida-ne’e tanba montante ida-ne’e seidauk klaru. Ekipa parlamentu nian ho Governu nian sei tuur hamutuk hodi deside loloos montante ikus liu. Kuandu ita halo lelaun ne’e bele sai ita-nia reseita,” Sekretária Jerál PN ne’e esplika ba deputadu sira.

Jornalista: Evaristo Soares Martins

Editor: Cancio Ximenes

HAKEREK NO HATÁN

Please enter your comment!
Please enter your name here