Família lori Saudozu Lucas da Costa "RAMA METAN" nia Fotografia hafoin hala'o omenajen ikus iha Parlamentu Nasional, Segunda 9 Setembru 2019. Imajen/TATOLI

DILI, 29 setembru 2020 (TATOLI)-Oan hosi saudozu Lucas da Costa ‘Rama Metan’, ohin, hatama keixa ba Ministériu Públiku (MP) hodi kontra Reitór Universidade da Paz (UNPAZ), Adolmando Amaral.

Lucas Junior, ne’ebé halo keixa ne’e informa katak, keixa ne’ebé nia rekorre ba MP ne’e iha relasaun ho komentáriu  Reitór Adolmando Amaral nian iha rede sosiál Facebook ne’ebé hateten, Saudozu Lucas da Costa “Rama Metan” investe osan $6,000,00 kada tinan hodi sosa rekoñesimentu prémiu internasionál ne’ebé UNPAZ hetan durante 2012 to’o 2016.

Prémiu sira durante UNPAZ hetan mak hanesan Gold European Award for Best Practice by European Society for Quality Research 2012 on April in Amsterdam, European Society for Quality Research with Platinum Award on 7 July 2013 in London, Diamond Award for Best Leadership in Las Vegas 17 July 2015, ho mós prémiu European Society for Quality Choice Prize, Berlin 2016.

Liuhosi komentáriu Reitór Adolmando nian iha  Facebook  ne’e mós, tuir Lucas Junior  hateten, misiona rekoñesimentu ne’e sosa de’it, maibé la’ós rekoñesimentu ne’e organizasaun ka peritu internasionál mak  fó ba UNPAZ nia susesu, nune’e mós rekoñesimentu ne’e la liuhosi peskiza (survey) internasionál no sosa de’it.

“Tanba ne’e, ami hanesan oan no família sira lamenta ho  komentáriu  ne’ebé Reitór  Adolmando públika iha mídia sosiál Facebook,” hateten Lucas Junior hodi aprezenta mós mensajen sira hosi Adolmando nian ba Agência Tatoli, ohin, iha Dili.

Nia konsidera, akuzasaun hosi atuál reitór UNPAZ ne’e  laloos, tanba UNPAZ hetan rekoñesimentu internasionál tanba dedikasaun hosi Saudozu Profesór Dr. Lucas da Costa, dezenvolve universidade ne’e tuir regra no padraun akadémiku ne’ebé mundu internasionál hatuur.

Oan hosi Saudozu ne’e hateten, Saudozu Lucas da Costa “Rama Metan” hanesan fundadór no konseptor prinsipál UNPAZ  hahú hosi universidade ne’e harii to’o nia hakotu iis iha tinan 2019.

Deklarasaun reitór UNPAZ Adolmando nian iha Facebook ne’e  mós  família sira entrega hotu ba MP hanesan evidénsia ida.

Adolmando prontu responsabiliza

Magnífiku Reitór Universidade da Paz (UNPAZ), Adolmando Amaral. Imajen Tatoli/Eugénio Pereira

Hosi sorin seluk, Magnífiku Reitór UNPAZ Adolmando Amaral, liuhosi telefone ba Agência Tatoli klarifika katak, nia laiha intensaun ida atu defama ka hateten aat eis Reitór UNPAZ, Saudozu Lucas da Costa “Rama Metan” ninia lideransa. Lia fuan sira ne’e nia fó sai tanba mosu diverjénsia ideia no opiniaun.

“Ami hamosu diskusaun ne’e tanba UNPAZ hetan prémiu apresiasaun haat hosi internasionál iha tinan sira liubá, maibé prémiu ne’e la bazeia ba peskiza (survey) ida inklui mós laiha kompetisaun ida mak UNPAZ partisipa ho ensinu superior sira seluk iha mundu internasionál maibé UNPAZ bele hetan prémiu sira-ne’e,” nia hateten.

Tuir Adolmando, talvés prémiu apresiasaun haat UNPAZ hetan ne’e tanba estratéjia investimentu boot ne’ebé UNPAZ halo ona ho montante purvolta $5,000,00 to’o $6,000,00 hodi halo imajen ba universidade (pencitraan) durante ne’e.

Nia dehan, família hosi Saudozu Lucas la simu no konsidera nia  halo difamasaun, tan ne’e sira halo ona keixa ba MP, maka nia prontu responsabiliza.

“Ha’u ko’alia  liafuan sira-ne’e, maibé laiha intensaun. Agora ho diskusaun sira hanesan ne’e mak família sira hanoin katak ha’u halo ona difamasaun hasoru Saudozu Lucas to’o lori ba keixa iha MP, hanesan Reitór prontu responsabiliza no prontu hasoru malu tuir dalan justisa,” Adolmando afirma tan.

Jornalista   : Nelson de Sousa/ Tomé Amado

Editór        : Francisco Simões

 

HAKEREK NO HATÁN

Please enter your comment!
Please enter your name here